5月份嘅十強餐廳都幾多元化，中、西、日、台式都有，有唔少更係地區名店添。
第10位 Gyutan Toku（*新上榜）
圖：喺牛舌關注組中得到ching們大力推介嘅土瓜灣居酒屋，牛舌當然係主打。餐廳選用最少3日熟成牛舌，厚切2cm，爽口同時帶有脂肪感，肉質又嫩身，仲可以點wasabi同柚子鹽等，牛味突出，難怪新開冇耐已經可以極速上榜。
第9位 意堡（*新上榜） 
圖：漢堡係好多人嘅comfort food，小店中嘅漢堡就更comfort喇。觀塘呢間小店細細間但性價比幾高，除咗常見嘅芝牛堡同啡菇堡外，更有自家製豬頸肉漢堡同辣椒膏豬扒漢堡等。前者嘅豬頸肉勁厚身又彈牙，後者塊豬扒則炸至外脆內軟，辣椒膏辣度剛好仲帶有少少甜味。重點係，呢度仲有好可愛嘅貓店長駐守啊。
第8位 魚事者
圖：剛得到米芝蓮必比登推介嘅魚品輕食店，隨即吸引到好多人登門朝聖，仲打入埋十強位置。小店主打魚肉小食同魚麵，其中得到米芝蓮推介嘅菜式包括炸魚無薯條、蝦頭油炸蝦球魚麵撈同Fish-chos扮墨西哥魚皮等，詳細介紹可睇最新專訪文章（按此）。
第7位 4口（*新上榜）
圖：主打新派福建菜嘅餐廳喺香港唔算太多，呢間位於中環嘅都幾受歡迎，特別係lunchtime時間經常都要等位。福建金湯佛跳牆、廈門沙茶麵等都係必食推介，仲有香煎蟶子蛋都係平時比較少機會食到嘅，蟶子彈牙，鮮味十足。好多人都會叫返道甜品埋尾，洛神花茶凍又係一大傑作，清涼酸爽，好啱夏天。
第6位 Homeland 
圖：從開業起就儲落唔少人氣，大埔兩層高嘅西餐廳，一直獲得唔少熟客回頭支持。63度溫泉蛋卡邦尼意粉係招牌菜之一，手工意粉口感彈牙，比一般意粉粗身，掛汁力強，所以條條都索晒蛋香味。香城和牛漢堡有肉香又有肉汁，係好多肉食獸嘅首選呢。
第5位 日月堂
圖：位於觀塘嘅台灣菜，大部分人去親通常都會叫返碗紅燒牛肉麵，或者牛三寶麵，加多份蛋餅咁就好滿足，因為牛肉湯底好香，夠濃夠清甜，牛肉又煮得軟腍入味。但如果食得辣嘅朋友仔，強烈推薦要試下麻辣牛肉冬粉，煙煙韌韌又索汁，辣得過癮。
第4位 Tempo Tempo（*新上榜）
圖：打卡嘅餐廳總係有上榜嘅優勢。呢間酒吧，室內裝修行復古英倫風，室外就係chill chill露天酒吧，絕對係好友相聚嘅打卡天堂。連杯cocktail都靚仔過人，有獨角獸又有紅鶴。食物方面揀Parma就啱晒，大量parma ham舖喺面，多到遮住晒成塊pizza，勁啱送酒。同埋唔好錯過大大杯嘅tiramisu，咖啡酒味幾香架。
第3位 粗店燒烤（*新上榜）
圖：串燒店嚟講呢間幾細心，每張枱上都有個烤爐，令到每份上枱嘅串燒依然可以keep住熱度。燒茄子、羊肉串、雞皮等都好受歡迎，但講到推介，唔少得烤生蠔，又飽滿又juicy。另外仲有甜麻雜貝都值得一試，湯底麻辣惹味，青口、蜆肉等滲有陣陣辣香，調味唔錯。
第2位 2 Soon Café（*新上榜）
圖：太子呢間餐廳，日頭係café，夜晚就變身成酒吧，日夜兩個feel。食物選擇唔算好多，但就幾有心機。蟹肉伏特加香辣蕃茄忌廉粗管通粉微辣帶甜，蟹肉碎量十足。幾乎枱枱都會叫嘅法式西多士•花生醬•煉奶·香蕉·焦糖曲奇碎•雲尼拿雪糕的確係幾吸引，直情將西多昇華。最得人歡心係會插咗塊Lotus餅乾喺面，仲有香蕉係焦糖脆面，口感層次豐富。
第1位 二世祖（*新上榜）
圖：大角咀區內名氣滿滿嘅餐廳，幾乎日日都爆滿。自家製芥末洋蔥醬炸雞窩夫大大份，炸雞夠脆，窩夫蛋味又濃，篤穿隻太陽蛋流埋啲蛋汁落去，再淋埋楓糖咁食，係享受。仲有，一定要叫朱古力奶，呢度招牌嚟，口感好rich但又唔會好甜。
文：Kar
