新一年電費、車費、隧道費乜都加，係人工就無乜點加到？唔緊要，嚟到深水埗一樣搵到唔少超抵美食，好似呢間新開嘅日本餐廳主打即叫即做火炙壽司，最平都係$6件！想飽啲仲有即做手卷，最平$12，豪啲要海膽雙拼亦係$55起，豐儉由人。
 

炙開喺深水埗欽州街，店如其名主打即做火炙壽司，客人點單後用火槍炙燒新鮮食材。壽司亦全部由師傅手握而唔係用機器，由最平$6到$20/件，原來因為老闆喺同區亦有日式壽司店，所以來貨價較低，自然可以平啲賣畀各位街坊。

即做火炙壽司系列（$6-20/件）

呢度係最受歡迎嘅幾款火炙壽司：三文魚（$6/件）選用挪威三文魚，火炙過後魚油香突出，想再感受多啲入口即溶感就可以試三文魚腩皇（$20/件）。吞拿魚（$10/件）同特大牡丹蝦（$12/件）都食得出食材新鮮。
 

呢三件就係特別推介，厚切鰻魚（$15/件）果然夠厚身，燒汁香甜而且鰻魚肉質都幾結實。霜降牛肉（$15/件）用嘅係安格斯牛小排，燒過後香味突出而唔會太油膩。而燒魷魚（$12/件）就特別配上甜辣醬，微辣惹味。呢度嘅壽司唔少都已經有調味，唔加Wasabi同豉油都得。
 

鵝肝海膽手卷（$55）

手卷食材配搭就更加多元化，比較特別嘅有雙拼推介系列，好似呢份鵝肝海膽手卷就係開店以嚟最受歡迎嘅配搭之一。鵝肝會加上砂糖燒成焦糖脆面，海膽更加用上日本馬糞海膽 ，味道鮮甜。
 

 

蟹膏海膽手卷（$68）

採訪當日小店最新推出嘅款式，用日本松葉蟹蟹膏加上馬糞海膽，而且唔單止手卷上面咁足料，手卷中間亦加咗蟹膏，所以食落啖啖都係蟹膏微鹹嘅鮮味。
 

小店以外賣為主，亦有少量吧枱座位可以畀大家坐低食。菜單選擇仲包括沙律、冷麵、飯、手握壽司，同自選魚生飯，質素唔錯之餘仲係收街坊價，難怪新開張已經有唔少熟客啦。
 

炙
地址：深水埗欽州街49號德寶大廈地下

文、相、片：Cathy