話咁快，2020就過咗一半。由年頭大家都唔敢出街食，到最近，好多間餐廳都人頭湧湧，昔日要排隊等食飯嘅情況又出現返。觀乎6月嘅十強名單，睇嚟大家都愈嚟愈注重健康，食多咗啲主打健康食物嘅餐廳，不過，牛肉同芝士依然都係冇得輸。
第10位 Mango Mania（*新上榜）
圖：夏天就係想食芒果呀，呢間由泰國清邁開過嚟嘅芒果店，選用自家生產嘅泰國水仙芒製作多款芒果甜品，難怪咁受歡迎，打入十強！最豐富就梗係超級芒果狂熱啦，咩都有啲，好似芒果糯米飯、芒果雪糕、芒果布甸等等，全部都又甜又juicy。
第9位 Amitie Kitchen 
圖：主打fusion菜嘅西餐廳，款款菜式都係賣相、材料吸引。好似松葉蟹膏配白酒忌廉汁咁，成隻爆膏嘅蟹蓋放面，見到都流晒口水，意粉掛汁，味道香濃；廚師推介嘅脆炸軟殼蟹牛油果漢堡配蕃薯條又係大大個，炸得香脆可口。
訂座優惠：正價7折: 主菜餐牌
第8位 EverShine（*新上榜）
圖：eataroundwithme、Julianeating
香港人愈嚟愈注重健康，呢間餐廳唔止賣健康食品，餐牌上仲寫明每樣食品嘅卡路里，抵佢入十強嘅。佢哋有多款唔同顏色嘅乳酪碗，桃紅色嘅係火龍果乳酪碗，入面有士多啤梨、藍莓等多款生果，仲有椰子片、superfood亞麻籽同黃金藜麥，邊個話健康嘅嘢就唔好食架？
第7位 玄鮨
圖：allison fsc、food_enthusiasthk
忍咗咁多個月，愈嚟愈多人出返街食飯，仲要食高質嘅廚師發辦補返數，造就咗呢間日本料理再次上榜。佢哋嘅食材每日由日本空運到港，無論係刺身定壽司都好新鮮，帶子爽甜、拖羅滿滿油脂香，熒光魷魚仲要爆膏！甜品都好有誠意，除咗生果，仲有雪糕夾餅。
第6位 HAND3AG（*新上榜）
圖：要喺芸芸食店中突圍而出，少啲創意都唔得。呢間餐廳靠嘅係全港首創嘅鐵板三文治，內餡同樣充滿驚喜，有夾住拉麵、自家製日式叉燒片同溏心蛋、牛油粟米等嘅拉麵叉燒鐵板三文治，好似真係食緊碗拉麵咁，幾過癮。
第5位 泰潮（*新上榜）
圖：位於中環嘅泰菜餐廳，價錢親民，一個二人餐就有晒湯、小食、例牌海南雞同甜品等等，好抵食，仲要味道有水準喎。海南雞係餐廳嘅招牌菜，雞肉嫩滑，識揀一定揀埋雞油飯一齊食。而鍾意咖喱香嘅朋友，都會得到滿足，因為呢度嘅咖喱都好香口，又唔會勁辣，送飯一流。
第4位 DAMA（*新上榜）
圖：呢間輕食飲品店，有多款低糖蛋糕，同埋冇牛奶成分嘅純素軟雪糕，仲要顏色鮮艷，啱晒打卡。其中，紅肉火龍果味有成80%果肉，啖啖天然甜味。心太軟嘅口味亦好獨特，一款係鹹蛋，一款係班蘭，都係坊間少見。一切即見流漿，好治癒。
第3位 Outdark
圖：由韓國開到香港嘅炸雞店，有5款口味嘅炸雞，辣同唔辣嘅都有，但最受歡迎嘅，反而係芝士肋骨鍋。店員以芝士捲住豬肋骨，做到拉絲效果，芝士控實忍唔到口，影完張呃like相要快快手食啦~
訂座優惠：指定時段訂座可享全單9折優惠 或 學生可享85折優惠
第2位 麵麵
圖：主力提供自創嘅手工魚麵，咁獨有，當然有力問鼎三甲位置啦。雪白魚麵幼身啲，含魚肉多啲，口感脆身啲；至於手工魚麵則約有50%魚肉，口感煙韌啲；另外仲有魚烏冬，全部嘅魚味都好突出，清甜嘅湯底同樣滲透住陣陣魚鮮香。
第1位 Moo Moo's（*新上榜） 
圖：榜首嘅係一間新開冇耐嘅美式扒房，憑住一個$298嘅牛扒套餐，成功俘虜一眾牛魔王嘅心。塊牛扒係選用美國1855黑安格斯肉眼牛扒，由美國空運到港。牛脂香而肉質軟，仲好juicy添。重點係，個餐可以任食薯條添呀，勁抵。
餐飲券：$100現金券
文：Kar
