7月份好評餐廳十強
2023-08-07

你哋出街食係點揀餐廳?要靚定要好食?Why not both?今個月嘅十強榜,有唔少都係又啱打卡,食物又有質素嘅餐廳,可以參考下呀。

第10位  Alvy's(*新上榜)

 圖:AmizoLaubellofood

鍾意食Pizza嘅朋友仔一定要嚟呢間試下,上得十強榜梗有實力之處。佢哋主打手工pizza,啲配料都好特別,坊間少見,例如有款白鬼薑蓉叉燒薄餅,中西合璧,仲要有芝士拉絲添,估唔到成件事又幾夾。其他小食亦都幾特別,雞翼會有威士忌燒烤炸雞翼,都係平時冇乜食過嘅配搭。

第9位 Crumbled(*新上榜)

 圖:luckiefoodie852tseinhei

一開舖已經成IG大熱嘅英國過江龍甜品店,火速打入十強榜一啲都唔意外。成間舖都係打卡位,以粉紅色為主題,杯杯由蘋果金寶變奏而成嘅Crumble杯,色彩繽紛又滿瀉咁,好吸睛。6款官配嘅底層都係黃桃加菠蘿,中間再疊上吉士醬,配料選擇有Lotus餅碎、麻糬等。

第8位  Mano(*新上榜)

 圖:hondawhiteCakejai

由觀塘開出銅鑼灣嘅新式意大利小餐館,除咗主打嘅手工意粉外,多款小食同主菜亦值得一試。巴馬臣芝士薯條啱晒芝士控,啲芝士鋪滿晒喺面,夠晒芝味。另外推介意式脆皮燒豬腩卷,外層燒到脆卜卜,肉質依然軟嫩,仲有肉汁添。

第7位  (*新上榜)  

 圖:sukina627chiselle313

又一間一開店就引嚟大量關注嘅甜品店,唔少朋友仔已經去咗朝聖同打卡。舖仔細細主打烤蛋糕、大阪燒、窩夫等甜品,其中必試嘅一定係即叫即焗嘅巨型日系烤蛋糕,有抹茶、焙茶、可可同芝麻等選擇,單係size已經好有睇頭,而且醬料更係自家製,蛋糕先煎後烤,口感鬆軟濕潤。

第6位  2 Soon Café 

 圖:seowoob慕容有兒

太子呢間café相隔一個月後再度上榜,想食香口嘢嘅去到可選日式吉列炸豬排三文治,炸漿好薄,而且炸完都唔太油膩,力推。至於蟹肉伏特加香辣蕃茄忌廉粗管通粉,雖則酒味唔重,但啖啖蟹肉,微微香辣,都幾惹味。

第5位  漫花燈火OMG(*新上榜)

 圖:betbetchucherb.space

絕對係打卡聖地呀呢間,無論係裝修格局定係甜品都係IG-able,去到你就明架喇。重點係好睇得嚟都好食,推薦甜品FIKA同埋潘朵拉盒子,前者好似喺草地上有雲朵咁;後者則有個用翻糖整成嘅玻璃罩,好鬼靚!鹹食可試法式大頭蝦占米多,蝦肉爽口彈牙,仲爆多膏添。

第4位  Yadllie Plate(*新上榜)

 圖:Foodie.Lyannacupsir

荃灣新開嘅韓式手工炸雞店,人氣十足。呢度嘅炸雞外脆內嫩兼留有肉汁,醬料更係使用韓國濟州島栽培嘅新鮮蔬菜同廿幾種天然材料混合而成,淨係誠意都要加分。口味選擇多,包括蜜味乳酪粉無骨雞啖啖雞、蔥蔥蔥等,叫驚喜二重奏,仲可以一次過食到安格斯牛小排同炸雞,夠晒開心。

第3位  Exotica Gelatea(*新上榜)

 圖:kk_genkiiamNICO

呢間可以話係全港首個意大利文藝復興時代主題餐廳,主力供應漢堡包、牛扒同意式雪糕。識食就梗係食和牛漢堡啦,即叫即做,塊和牛扒勁厚,又juicy,係滿足同幸福嘅感覺。Gelato有香蕉朱古力、桂花菊花等味,連D24榴槤味都有呀!

第2位  Undici(*新上榜)

 圖:whiteshirtangelpigfoodiexhk

銅鑼灣一間好啱坐低慢慢傾偈食嘢嘅café,招牌菜名古屋蒲燒鰻魚蛋包意大利飯最受歡迎,大大條鰻魚舖喺飯面,味道濃郁。鰻魚汁滲埋落risotto度,甜香惹味。唔好食太飽,記得要留肚食埋芝士蛋糕,有幾款唔同口味架,想清新啲冇咁膩嘅,柚子芝士蛋糕就啱晒。

第1位  龍亭(*新上榜)  

 圖:kyanxxchiselle313

位於佐敦嘅日式鐵板燒餐廳係今個月嘅榜首,餐廳由日籍廚師主理,提供廚師發辦鐵板燒套餐,包有海鮮同肉類,伴碟仲好靚添。好似海鮮2品咁,會有個以蝶豆花打成嘅泡泡喺隔籬,將帶子、廣島蠔等海鮮點埋泡泡食,仲可以提升鮮味添啊。


文:Kar

Keyword
十強
十強名單
十強報榜
佐敦
銅鑼灣
荃灣
旺角
開飯專題
開飯仔為你提供各類型最新飲食情報及優惠,全面照顧你的飲食喜好。
Restaurant Info
Show More
Show Less
Monthly chart
The Full List of 36 MICHELIN Star Restaurants in The MICHELIN Guide Thailand 2025⭐️
7 Days Ago