台灣之所以叫做寶島，其中一個原因一定係各地嘅特色美食。鑽石山區一間商場即將舉辦街頭小食節，將台南其中8間人氣在地早餐同宵夜美食帶到香港：手工蛋餅、麻油米糕、三層肉刈包、酥炸魚柳等等，一站式盡情品嘗各款台南風味小確幸！

由台灣觀光局、台南市政府觀光旅遊局同鑽石山荷里活廣場合作舉辦嘅「台南街頭小食節@荷里活廣場 - 排隊小店的早宵風味篇」，將會喺4月15號至17號一連三日為大家帶嚟8間人氣台南街頭小食，而且仲係唔少遊客同本地人都非常鐘意嘅特色早餐同宵夜！

唔單止香港有美食車，台南一樣有，「糯夫米糕」係由90後老闆騎住單車去到唔同地方賣佢嘅古早風味麻油米糕。能夠去到唔同地方都咁受歡迎，全因米糕食譜經過用心改良，令米糕保留陣陣麻油香同軟糯彈牙口感之餘，仲食到入口即化嘅豬軟骨肉。

而「所長茶葉蛋」嘅招牌茶葉蛋豆干堡亦大有來頭，豆干要先滷製三小時以上，再經過一日冰鎮，切開中間再夾特製酸菜、台式泡菜同1/4隻藥膳茶葉蛋。唔好睇小呢隻茶葉蛋，隻蛋要先做SPA按摩再用十幾種中藥低溫滷製96小時，蛋黃特別綿密多汁。
 

另一人氣小店「等天光三明治」帶嚟嘅唔係三文治，而係店家宵夜招牌之一酥炸思慕魚柳，用台南代表食材虱目魚油炸，食落外酥內嫩。而且配搭老闆自家研發嘅美式塔塔醬，酸酸甜甜減低油膩感。

無獨有偶「長盈海味屋」亦用咗台南嘅虱目魚，皆因佢地嘅香煎虱目魚菲力被公認為同鹹粥配搭起嚟係最傳統嘅台南早餐。佢地嘅虱目魚甚至係自己飼養，煎之前再以冷風乾燥保留水分同彈性，令魚肉食落嫩滑帶嚼勁。

活動仲有「阿杰手工蛋餅」嘅即叫即做手工蛋餅，「碗開富粿美食館」嘅傳統招牌碗粿，「一點刈包」嘅真材實料招牌刈包，同「王家庄狀元粿」嘅QQ彈牙狀元粿，一試難忘。

台南街頭小食節@荷里活廣場 - 排隊小店的早宵風味篇
活動日期：2017年4月15日至17日 
地址：鑽石山龍蟠街3號荷里活廣場一樓明星廣場
*品嚐台南街頭小食於活動期間每日下午1時起開始，市民只需捐款港幣20予港澳台灣慈善基金會，即可換領小食一份。每日數量有限，先到先得，換完即止。

文：Cathy

隨時接收最新資訊
讚好OpenRice專頁！