「打卡打卡記得打卡」，唔係講返工打卡，係講緊去食杯抹茶朱古力雪糕打卡呀！Godiva推出香醇抹茶系列，當然唔少得最受歡迎嘅軟雪糕，清新抹茶加香醇黑朱古力，估唔到原來又幾夾下。另外仲有凍飲，同朋友去一人一杯就最啱！
 

抹茶黑巧克力軟雪糕（$50）

成個香醇抹茶系列有三個選擇，開飯仔覺得最值得試嘅係抹茶加黑朱古力扭紋，始終朱古力軟雪糕係Godiva嘅王牌之一嘛。
 

抹茶軟雪糕口感幼滑，有清新抹茶香。雖然回甘度的確不及各大日本抹茶老店出品，不過茶香同黑朱古力嘅可可香亦相當合拍，一改平時朱古力雪糕比較甜膩嘅印象。當然如果你係Die Hard抹茶控，亦可以直接食抹茶軟雪糕（$50）嘅。
 

抹茶白朱古力凍飲（$50）

兩款軟雪糕之外，抹茶系列最後一款係冰沙，以抹茶粉、朱古力粒、冰粒等打成細碎口感嘅冰沙，再加上忌廉、朱古力醬同Godiva朱古力牌。
 

綠色嘅冰沙飲落抹茶香味唔算非常濃郁，皆因杯邊有朱古力醬裝飾，冰沙裡面亦有唔少朱古力碎，所以同抹茶黑朱古力軟雪糕一樣係抹茶同可可香各佔一半。香醇抹茶系列即日起觀塘apm分店率先發售，1月22日起全港分店供應，售完即止㗎！
 

農曆新年禮盒系列

情人節禮盒系列

如果想食軟雪糕順便揀下禮盒嘅話，不妨喺1月21號或之前嚟到觀塘apm分店，皆因喺商場大堂有特別活動，一次過睇哂今年嘅農曆新年同情人節禮盒。
 

而且活動期間仲有會場限定優惠，各位Godiva Fans唔好錯過啦。
 

文、相、片：Cathy