難得有復活節四日長假但未有地方去？如果你係咖啡迷嘅話，唔好錯過喺PMQ舉辦嘅Coffee Agenda咖啡生活市集！特別邀請台灣同日本咖啡師到場交流，亦雲集香港多間精品咖啡店。仲有咖啡體驗區、咖啡工作坊等節目。去之前不如睇定開飯仔有咩推介先啦！
日本咖啡品牌 Trunk Coffee
手滴咖啡（$50起）
Origami Dripper 咖啡濾杯（$270）
今次市集特別請嚟日本Trunk Coffee，創辦人鈴木康夫先生係第一位遠赴丹麥學咖啡嘅日本人，品牌揉合北歐咖啡技術同日本職人精神。現場供應嘅三款手滴咖啡有三款咖啡豆選擇，開飯仔就試咗肯尼亞豆，味道微酸柔和，有啲似奇異果，相當易入口。而品牌嘅Origami Dripper 咖啡濾杯以日本摺紙為靈感，色彩繽紛之餘亦係近年國際沖煮賽事新寵呀。
驚喜咖啡泡泡雪糕 sensory ZERO
咖啡泡泡雪糕（市集限定 $45）
咖啡除咗就咁飲，當然亦可以整甜品！呢個品牌今次市集就推出咖啡泡泡雪糕，上層係House Blend Expresso 泡泡，輕盈口感令咖啡果香更突出。而下面係雲呢拿雪糕，特別在會噴上無酒精成分嘅啤酒，所以成杯甜品唔單止似泡泡版嘅Affogato，仲帶少少酒香！
檸檬王聯乘 Urban Coffee Roaster
UCR Cold brew x Lemon King（市集限定 $50）
呢個新鮮烘焙咖啡品牌就同香港老字號涼果品牌檸檬王合作，用檸檬王嘅話梅整成話梅汁，再加品牌冷泡咖啡、梳打水同乾檸檬製作呢杯市集限定嘅咖啡特飲。氣泡口感令特飲更Refreshing，而且估唔到咖啡同話梅味道又幾夾！
竹蔗咖啡配鴛鴦窩夫 Summer Ice
（左）竹蔗茅啡（$70），（右）洪都拉斯（$60）
窩夫（鴛鴦/咖啡/伯爵茶 $40）
另一個創意配搭：竹蔗茅根配冷泡咖啡！呢間甜品店用自家熬足六小時嘅竹蔗茅根馬蹄水加冷泡水洗洪都拉斯咖啡，本身洪都拉斯咖啡都帶少少類似蔗糖甜香，所以唔使加糖，飲落味道已經夠清甜，平時怕咖啡苦嘅朋友都可以一試。而甜品店嘅招牌窩夫呢度亦有供應，仲係即叫即製，有鴛鴦、咖啡，同伯爵茶三款口味。
大熱手工雪糕 hushush ice cream.coffee
手工雪糕、全素雪葩（$50-$60）
手沖咖啡（$70起）
天氣悶熱想食返杯雪糕，呢度就有多款口味任君選擇！最受熟客歡迎嘅係日本雙岳混合威士忌口味，食落酒味比想像中柔和，反而有種類似水果嘅甜味。另一推介係椴樹雪蜜鼠尾草口味，甜味清雅，一個人食完成杯都唔會覺得Heavy。當然想試咖啡嘅話，亦有唔同手沖咖啡同冰釀咖啡選擇。
漸層Espresso Tonic Studio Caffeine
Espresso Tonic（$25）
同樣係消暑之選，呢間精品咖啡店今次特別搵嚟三款英國嘅Tonic Water畀大家選擇，好似接骨木Tonic Water可以增加草本花香，飲落亦會甜啲。揀好Tonic Water底後就會倒入House Blend Expresso，形成搶眼漸層賣相。
柴犬加持冠軍咖啡 Black Sugar Coffee
手沖咖啡（$50）
George Howell Coffee咖啡豆（$300）
呢間咖啡店好易認，搵到佢哋店長：柴犬黑糖嘅大頭就得！佢地主打嘅Gardelli Specialty Coffees咖啡豆得過世界烘焙咖啡豆冠軍，開飯仔試嘅係盧旺達慕呼拉豆，聞起嚟有柑橘香味，酸味平衡。而咖啡師William啱啱去咗一轉美國，完成世界咖啡師大賽評審工作之餘，亦將波士頓嘅George Howell Coffee帶到香港！呢個品牌喺香港比較少見，係美國東岸早期推廣精品咖啡嘅品牌之一。
咖啡變Craft Beer Cotton Mutton x The Ale Project
（左）Fake Juice（$62），（右）HK Black Porter（$52）
本地精品咖啡品牌同精釀啤酒生啤館嘅組合，就誕生出咖啡黑啤！HK Black Porter混合七種唔同種類嘅麥芽，所以飲落唔單止有咖啡香，亦帶焦糖同朱古力甜味，最後有一絲辛香味，好過癮。而Fake Juice雖然睇落真係有幾分似果汁，但其實係無任何水果成分嘅NE IPA啤酒，味道帶類似西柚咁嘅微澀。
少見剛果咖啡豆 Ideaology
手沖咖啡（$60）
品牌為今次市集搵嚟非洲唔同地方嘅咖啡豆，除咗大家飲開嘅埃塞俄比亞豆，仲有蒲隆地、盧旺達，甚至剛果嘅咖啡豆！水洗剛果咖啡味道甘甜，甚至帶Earl Grey茶香，相當特別。
全素燕麥奶冬甩 raw bean
全素冬甩（$10-30）
市集有咖啡亦有甜品，呢檔就主打全素冬甩，用有機食材製作、無精製糖、無動物成分。例如用瑞典Oatly燕麥奶代替牛奶，跑「素」朋友都可以放心享用。
現場特設GO CUP借杯服務，去攤檔畀$20按金就可以借杯，亦有特定沖洗區方便大家洗杯。而且自己帶杯去攤檔買咖啡可以減$2，慳錢兼支持環保呀。
The Coffee Agenda咖啡生活市集
活動日起：即日起至2019年4月22日（12:00-20:00）
地址：中環鴨巴甸街35號PMQ 元創方地面廣場
文、相：Cathy