Omakase(廚師發辦)係品嘗日本料理嘅最高境界,近年喺香港愈嚟愈流行,各位識嘆人士一定都好熱衷尋找可以滿足你味蕾同心靈嘅Omakase。最近,講究高級黑毛和牛燒肉嘅專門店 YAKINIKU GREAT 喺中環SoHo區開設第2間分店,主打最高級嘅A5和牛Omakase,將日本燒肉推向更高層次!


新店最矚目嘅賣點,就係有專人幫你燒肉。燒肉專員全部都經日藉老闆津川勝治直接指導,作為食客,唔使自己郁手就可以食到火喉恰到好處嘅美味燒肉,專心享受美食。另外,餐廳只選用 BMS (Beef Marbling Standard) 等級10或11嘅和牛,呢類肉屬於「赤身(紅肉)」,脂肪分佈較少,無論係霜降度、紅肉比率同肉質等都係最高水平。被評為 BMS 10 以上嘅和牛,成個和牛市場只得8%,而和牛稀少部位如「Misuji(三筋)」、「Shakushi(杓子) 」、「Daisankaku(大三角)」等,就只佔成隻牛嘅3%,超級矜貴㗎!

3款Omakase套餐入面最高級、最豐富嘅套餐「FULL OMAKASE“KIWAMI「極」”」,包括咗主廚推薦嘅7款特選牛部位,種類多之餘品質超佳,一個套餐畀你食盡頂級A5和牛同罕有嘅稀少部位。

FULL OMAKASE“KIWAMI「極」” $880
先嚟一款前菜帶你進入和牛世界。呢款Misuji壽司選用從和牛臂部取出嘅霜降肉,係和牛稀少部位之一。薄薄嘅霜降肉刺身口感幼嫩柔軟,帶淡淡脂肪油香,同飯香相配,做成壽司味道一流。


前菜過後,當日師傅選擇 Yaki Sashi (焼き刺し)同Fillet (特選ヒレ)作為第一碟燒肉。一薄一厚嘅鹽燒牛肉畀食客一開始先品嘗入口即融嘅霜降肉,然後再享受柔軟而且肉汁豐富嘅厚切赤身肉,為Omakase套餐打響頭炮。



第二碟燒肉係2款汁燒肉,分別係店中人氣No.1嘅霜降肉Misuji同稀少部位Daisankaku。燒過嘅Misuji肉片入口即融,淡淡肉味同油脂香蔓延口腔之中。而Daisankaku雖然係赤身肉,但佢帶有適度油花,濕潤多汁,食落同Misuji相似,但肉味更濃郁,更有嚼口。呢兩款肉配合以蘋果汁同麻油特製嘅燒肉醬油,味道非常有層次感,肉味、油香同果味香甜相互混合,感覺新鮮。

跟住落嚟就到厚厚嘅Misuji Briand(ミスジブリアン)。呢塊咁有厚度嘅Misuji Briand,唔好睇佢大大塊,佢其實係從Uwa Misuji(うあみすじ)旁精心取出嘅超少量赤身肉部位,食落同Fillet相似,但濕潤度更高,肉質非常軟嫩,超級稀有。不過套餐食到一半,感覺有少少油膩,好彩呢款肉係配合加入木魚碎同醋嘅特制木魚酸汁食用,微酸醬汁有refresh作用,清除油膩感。



食完厚切赤身肉Misuji Briand,就到鹽燒薄切Tougarashi(とうがらし)。呢款肉同Misuji、Daisankaku一樣都係喺牛嘅前臂取出,但佢帶有適度肉感,味道較清新唔油膩,較有口感。呢款燒肉會配上木魚湯一齊食用,食完肉後再飲用帶有牛肉汁嘅木魚湯,可以從另一個角度品嘗和牛嘅所有精華。


最後就到呢碟超吸睛嘅Chateaubriand(シヤトーブリアン)。Chateaubriand係Fillet最中心、最厚、最高級嘅部份,係成隻和牛最柔軟嘅極上之肉!呢個咁高級嘅部位燒熟後放上白飯,面頭放上新鮮北海道海膽,再淋上以牛油、蒜頭同醬油煮成嘅熱汁,最後灑上蔥,就成為一碗望見都流曬口水嘅極上北海道海膽Chateaubriand飯。頂端堆成小山丘嘅北海道海膽味道超級鮮甜,配上極香嫩嘅Chateaubriand,再加上牛油蒜頭醬油令兩者味道更濃郁。


另外,主廚木村康洋先生為新店研發咗一個啟發自涮涮鍋(Shabu Shabu)嘅燒肉新食法-「KIMURA YAKI 2」。「KIMURA YAKI 2」以木村康洋先生嘅名命名,西冷上灑上糖,再喺燒肉嗰陣淋上特製醬汁,令肉喺燒烤過程快速吸收醬汁味道,最後沾上打發好嘅生蛋汁。呢個食法令西冷肉帶有甜味,幼滑蛋汁令燒肉亦有滿滿蛋香。不過西冷肉味較濃,油脂較多,啖口味嘅朋友或者會比較鍾意Misuji。




另外,主廚木村康洋先生為新店研發咗一個啟發自涮涮鍋(Shabu Shabu)嘅燒肉新食法-「KIMURA YAKI 2」。「KIMURA YAKI 2」以木村康洋先生嘅名命名,西冷上灑上糖,再喺燒肉嗰陣淋上特製醬汁,令肉喺燒烤過程快速吸收醬汁味道,最後沾上打發好嘅生蛋汁。呢個食法令西冷肉帶有甜味,幼滑蛋汁令燒肉亦有滿滿蛋香。不過西冷肉味較濃,油脂較多,啖口味嘅朋友或者會比較鍾意Misuji。


燒肉當然離唔開美酒,餐廳提供多款酒類,包括清酒、燒酒、梅酒、威士忌、啤酒等。當中清酒大信州比較辛口,配合燒肉一流;惣譽就芳香啲,可以昇華燒肉濃郁肉味。另外,亦有提供5款紅、白酒,全部都係日式酒吧「Nocturn」嘅重點推介,同頂級和牛燒肉好夾啊!

YAKINIKU GREAT SOHO
地址:中環砵甸乍街45號 LOWER H CODE1樓
文、相、片:Kenna

YAKINIKU GREAT SOHO
地址:中環砵甸乍街45號 LOWER H CODE1樓
文、相、片:Kenna