之前咪同大家講過，今年嘅Wine & Dine係歷年最大、街頭小食最多，有成400幾個攤位嘅？咁多攤位，應該點行好？而家就逐區同你哋介紹下，再畀少少專家（唔係我）嘅貼士大家啦。

 (左起) 紀曉華、盧覓雪、吳煋姿

尊尚區

喺尊尚區，當然就會有尊尚名酒同星級美食啦，仲有個貴賓室，可以喺入面慢慢歎靚酒加靚景。識飲識食嘅盧覓雪就建議大家可以多啲留意下酒嘅產區，揀返隻自己鍾意嘅味。嚟自法國波爾多嘅Chateau Montrose 2010就係佢嘅重點推介嘞，好純好清新，帶有果香味。而呢區嘅美食就由幾間本地人氣、新派餐廳，例如小包包、Mercedes Me、Jinjuu、Bibo等等提供，鵝肝帶子慢煮三文魚通通都有得。要有「尊尚品酒證」先可以進入呢區㗎留意返。

（左起）
1. Chateau Montrose 2010（@屈臣氏酒窖, G05）【品酒券：3】
2. Pichon Lalande De Comtesse 1982 （@Wine High Club, G06）【品酒券：3】
3. Pavie St Emillion 1er GCC A 2010（@Royce Cellar, G13）【品酒券：3】
4. Chateau Pontet Canet 2010（@屈臣氏酒窖, G05）【品酒券：3】

（左上）煎北海道帶子配沙律與西檸（@BIBO, S06）【品酒券：2】
（右上）Wagyu Steak & Egg Rice Roll（@ 小包包, S02）【品酒券：3】
（左下）”Gangnam Style” Hot Dog（@JINJUU, S07）【品酒券：2】
（右下）Lawar Salad （@TRI, S04）【品酒券：1】

標準區
暢飲派對

由中環入口入嘅話，最先見到嘅就會係暢飲派對，喺度就可以飲到各種氣酒、果酒、香檳同甜酒等等比較易入口嘅酒。蛇王芬主理人吳煋姿就推介咗幾隻甜味較出，女仔應該會幾鍾意嘅酒。特別係莫扎特朱古力酒，呢隻朱古力酒淨係個樽都已經好靚，加入磨碎咗嘅榛子，色係朱古力色，未飲已經聞到好香嘅朱古力味，飲落就更加出，而且比較杰身，朱古力怪實會心心眼，建議配埋雪糕或者pancake邊食邊飲會開心啲。

莫扎特朱古力酒（@好望角葡萄酒, A011）【品酒券：1】

另一款Lambrusco Cavicchioli係意大利出產嘅汽泡紅酒，佢嘅紅比一般嘅紅酒更加艷麗，係接近紫羅蘭色嘅紫紅，好靚。呢隻酒帶有布冧、黑加侖子味嘅果香，微甜，配埋叉燒、乳豬食又幾夾。

（左一）Lambrusco Cavicchioli（@義生洋行）【品酒券：1】

而喺呢區同時都有好多經典嘅街頭小食，例如帶子元貝魚湯狗仔粉、彩虹吐司、芒果糯米飯、龍蝦芝士包之類，連近期大熱嘅芋圓豆花都有，品酒前食或者邊飲邊食都唔錯。

（左）帶子元貝魚湯狗仔粉、（右）威威司令迷你漢堡（@海洋公園, A105）

（左）彩虹吐司、（右）星空彩虹果汁（@卡洛芝士吐司專門店, C104）

國家展區

去到國家展區，就會有多個產酒國家同地區嘅美酒，除咗往年都有嘅歐洲及法國、德國、格魯吉亞、美國、拉丁美洲、意大利等，今年仲多咗澳洲同西班牙呀，要一晚「環遊世界」不是夢喇！水哥有禮創辦人紀曉華就介紹咗隻法國酒Generous Gin，呢隻酒嘅配料全部都係天然，包括接骨木果、茉莉花同柑橘等等，經蒸餾而成，係上年先至上巿嘅酒。所以飲落有好香嘅果味，係小清新嘅感覺。而西班牙嘅Neo 2004甜度同酸度都適中，幾易入口。

Generous Gin（@Natural Food and Beverages 歐洲法國區）

法國區另外仲有靚芝士食！

有各個地方嘅酒飲，同樣都有各國美食。西班牙代表當然就係火腿啦，用捲筒上又幾特別，而和風派就有松葉蟹膏肉蟹膏芝士燒，見個名就知堅多蟹膏，鮮味夠之餘亦有鹹香。

（左）松葉蟹膏肉蟹膏芝士燒 $50、（右）香煎法國鵝肝多士配黑醋汁 $50（@帝景酒店, C418）

Baked Crab Shell Stuffed With Fresh Crab Meat and Onion（@城巿花園酒店, C419）

（左）避風塘炒龍蝦鉗 $60/4件（@帝京酒店, C414）、（右）Serrano Ham in Cone（@嘉湖海逸酒店, C420）

至於另外兩區嘅專家教路，就下次再同大家分享，而家睇住呢兩區嘅介紹先啦。

專業美酒區

專業美酒區就會係一啲香港人平時比較少機會接觸到嘅著名酒莊或者產酒區所製嘅佳釀，另外會有專業品酒師同海外酒莊嘅莊主嚟一齊交流下品酒心得，又會有「Riedel 工作坊」提供各式嘅品酒班同埋有得獎名廚嘅烹調示範。

美酒佳餚新發現

呢區啱晒鍾意試新嘢同手工啤嘅朋友仔，全新嘅「威士忌區及手工啤區」可以一嚐朱古力同咖啡配搭而成嘅whiskey，又有得獎手工啤試。而「香港吧」就會有好多以香港為主題嘅特色cocktail，例如奶茶酒同菊花茶酒等等，既新奇又有本地特色！很想試吧？另外冷門地區嘅酒，例如以色列耶路撒冷都有。

了解更多：
Wine & Dine 2016 歷年最大、街頭小食最多（多圖）
Wine & Dine 2016 品味館活動預覽 酒店甜品下午茶香檳任飲
Wine & Dine 2016 贏取品酒證
官方網頁