品臻 (富怡花園)

Open Now

Now Closed

今日帶阿仔返小西灣探爺爺嫲嫲，但阿乖孫話唔想飲茶，係都要話食格仔餅，所以就去到小西灣先買啲小食，再搵兩老飲茶。上網search到呢間品臻，好似都幾啱食，於是乎就嚟買吓啲小食啦！見到佢門面都有好多唔同出品嘅poster，都幾多元化，啲相又影得幾靚，最緊要就係佢嘅價錢唔貴，搞到我都心思思叫咗幾樣小食同埋飲品。所有食品同飲品都係即叫即整，所以都要等大概10分鐘，不過就勝在夠新鮮熱辣辣。首先叫咗2杯飲品，分別係炭燒烏龍茶($20)及芋頭特濃鮮奶($31) ，烏龍茶茶味夠香濃，解渴一流，抵飲！芋頭奶有好多芋蓉，啖啖有口感，好飲！總之就正啦！格仔餅新鮮熱辣，雖然等咗一陣先食，但係仍然外脆內軟，配埋花生醬同埋煉奶，阿仔食到舔舔脷！呢個椒鹽花枝丸雖然有啲貴，要$6/粒，但佢係正宗台灣出品，大大粒夠彈牙，食到有花枝粒，嫲嫲都話未食過咁好味嘅丸店員仲推介我哋買台式鹽酥雞，我哋要咗一份大嘅，原來份量係勁多，鹽酥雞嘅調味鹹中帶香，個粉漿薄薄唔會太厚，脆而不硬，肉質保持鮮嫩帶有肉汁，所以去到酒樓仲偷雞攞咗嚟送飯食。今次嘅加料行動非常成功，兩老都好識欣賞，所以下次過嚟飲茶可以再去幫襯啦！

好難得小西灣終於有一間正式嘅台式飲料店🥤店舖感覺好乾淨，餐牌上面嘅飲品款式眾多，圖片望落去已經好吸引呢度除咗有台式飲品之外，仲有唔少小食，而今日我決定要試嘅就係原味格仔餅同黑糖珍珠奶茶。Poster設計好時尚，忍唔住想試店舖聲稱不使用化學人工果糖，雖然飲落去都未必分辨到，但起碼有個安心先🙈店舖有兩部機整雞蛋仔另外兩部整格仔餅，全部都係即叫即整，大概等左5分鐘已經有得食，唔算等左好耐，係等待期間都不時聞到陣陣蛋香。原味格仔餅 $16格仔餅望落好挺身，顏色都好靚，拎係手仍然聞到好香蛋味厚度算唔錯，入面只有煉奶同花生醬，醬汁份量都多，第一啖已經咬到。格仔餅外脆內軟，就算隔一陣先食都保持到脆卜卜，唔錯不過拎住個紙袋嘅時候要小心hi到，搞到黐立立。黑糖珍珠奶茶少糖 $21呢個係拎住飲品行左陣先拎出黎嘅樣，所以黑糖已經沉咗底。以呢個價錢來講算大杯，奶茶少糖的確唔甜，不過好可惜黑糖珍珠只係普通珍珠撈黑糖，而唔係真正用黑糖整出嚟嘅珍珠，所以當黑糖融入咗奶茶之後，珍珠就完全冇晒味啦同埋珍珠口感比較硬，唔Q彈，有啲失望。我諗下次嚟都只會食佢嘅小食，飲品就未必會再考慮了。