木屋大排檔

Open Now

Now Closed

平日放工訂左6:45pm 餐廳當時都無咩人後尾都陸續有人walkin 雖然餐廳唔細 但建議都係book定穩陣啲～炒粉唔會太濕 味道中上👍🏻份量都幾多 蝦都有四隻🤭配菜圍晒係旁邊 中意就自己撈店員都好貼心提醒小心辣粉🫰🏻有兩款生菜包 一款炒同一款講明唔係炒😂唔太知有咩分別下 我地叫左炒個款 下次再試下另一款～肉碎好香 因為同店員講左要最少辣所以唔太辣不過菜嘅份量就差少少先包得晒啲肉碎可以加$8加一份生菜好少係泰國餐廳見到用煲仔上嘅炒菜好香醬汁都幾濃 通菜都幾爽口一樣可以叫少辣————————————————————————總結整體都唔錯 晚市最好都book定位想叫芒果園但當日無 下次再試！

平時係大埔太和行出行入都會見到呢間木屋大排檔，當屋企人就好少機會過太和食飯，今日就約埋朋友一齊試下呢間已經屹立於大埔好耐嘅泰國菜！個名叫大排檔，其實入面裝修風格完全唔係大排檔座位好闊落，當日坐係門口第一排，開門關門會有少少熱，不過影響不大。鮮蝦炒金邊粉同朋友食第一啖都有種驚喜感覺，乾濕程度啱啱好，金邊粉口味偏甜，啱哂我同唔食辣嘅朋友。馬拉盞通菜係連個細煲仔一齊上的，通菜炒得好淋，夠惹味豆腐卜墨魚滑呢個小食十分脆口，怕熱氣同朋友share就啱喇，個汁係偏鹹，如果係有少少甜酸相信會更加夾！飲品方面我揀咗脆爆芒果園，而朋友就揀忌廉泰奶。上一檯我地都嚇一跳，超大杯鐘意超濃芒果嘅朋友千祈唔好錯過，芒果味又濃又香甜，好似直接食緊芒果咁！總括而言，份量十足，價錢公道，絕對值得一試！

今日約咗朋友去大埔食飯，佢介紹一間屋大排檔，起初以為真係一間大排檔，點知去到門面都唔錯，係一間裝修得幾好嘅餐廳，坐低之後就點咗個二人套餐，同埋各自點咗一杯有cream嘅奶茶，個套餐之中就點咗combo 配青木瓜沙律，黃咖哩花甲配蒜蓉包，和鮮蝦炒金邊粉；首先嚟咗兩杯奶茶，個杯好有特色，係骷髏頭杯，飲落啲cream再加埋啲奶茶係相當香滑，亦都冇苦澀味又加上好香嘅茶味，都好好味；跟住嚟個黃花甲配蒜蓉包，啲蒜蓉包仲暖嘅，同埋浸落啲黃咖哩度食，簡直就係絕配；個combo加青木瓜沙律有驚喜，原來上面有四款小食包括春卷，蔗蝦，蝦餅同埋一個炸嘅小食，青木瓜十分清新，而啲蔗蝦同埋春捲都相當美味；最後個鮮蝦炒金邊粉，啲蝦都好新鮮，金邊粉亦都炒得好有鑊氣；朋友介紹呢間木屋大排檔真係唔錯！

其實我成日都會路經呢間餐廳，而且亦收藏左一段長時間，但感覺要多D人去食先開心，所以遲遲未試。某個星期五終於約到屋企人陪我試😋，當晚6點3左右去到，場內已經半滿，以附近咁多食肆黎講，人流已經算唔錯。試新餐廳之前，我通常都會上網做功課，揀定D熱門食物，今次都唔例外。首先必點嘅係串燒拼盤，可以試哂豬牛雞串燒之外，仲可以試埋豬頸肉，岩哂心大心細嘅我😅。串燒拼盤 $148串燒麻麻，偏向乾身；豬頸肉中規中矩，肉質未去到好爽但又唔會好淋，不過份量唔少。辣椒膏豬頸肉炒飯 $72上枱果陣有少少失望，因為豬頸肉已經切成碎粒，雖然份量唔少，但存在感偏低。整體個炒飯幾唔錯，好有鑊氣，而且夠乾身，屋企人話最好味係佢🤤。鮮蝦炒金邊粉 $88本身唔係好想點金邊粉，事源有次係上水食過一個超難食嘅偽泰式炒金邊粉，而產生陰影後，就唔敢係新餐廳試金邊粉。不過今次見佢其他食物質素都正正常常，一於試埋佢。炒粉都好有鑊氣，加埋辣粉好惹味，蝦都爽口，不過無乜蝦味，而花生碎就有少少變味，盡量唔好撈埋黎食就無問題。冬陰功明爐海鮮鍋 $148呢個幾特別，明爐熱住黎食，冬天食岩哂。海鮮有青口、大蜆、蝦、魷魚，另外有大量秀珍菇，底部有粉絲。

沒有訂座，當晚客人不算多，食完身邊啲枱都未full，我們一行4人，點了5個餸，包括:公車諗霸 (即係泰式生蝦)店員勁風趣幽默，堅持我地要識讀"公車諗霸"先落單😂一共有隻蝦，蝦味道新鮮，頗有鮮味，但泰式酸辣汁酸辣味亦不足，唔太夠惹味冬蔭公椰奶味香濃，不太辣，亦十分足料，點埋火熱辣辣咁送去你面前，但香料切得好碎，飲一碗湯有半碗都係渣，不太方便進食及飲用鮮蝦炒金邊粉金邊粉炒得均勻，唔會痴埋一大舊，放在一旁的辣椒粉很辣，食唔到辣要小心，隻碟幾得意頸爆生菜包睇返menu佢有分炒同唔炒既肉碎，呢個係有炒的，頗惹味，生菜份量唔夠夾晒所有肉嚟食，但單吃肉碎也不會太咸西隆路邊炸雞炸雞粉漿太厚，咬一啖都成口皮，肉亦唔算多，旁邊的咖喱麵包反而有驚喜，食過返尋味，記得食埋個麵包，配咖喱食一流總括而言，食物水準達標，細微可以分高下，有興趣再嚟試其他餸菜，加上店員友善搞笑，又會主動同我地吹水，雖然我地無叫飲品，但會好留意我地夠唔夠水飲，上菜又會事先提醒我地小心，服務態度令整體用餐感覺更良好😋😋

好耐冇食泰國菜喇！出面泰國野閒閒地過百蚊一個餸，呢間絕對係抵食加過口癮之選！我哋連埋沙律、蒜蓉包、小食、餸菜叫咗六樣嘢，份量都好夠四個人食！因為屋企有老人家，所有餸菜我哋都叫咗小辣。青木瓜沙律 $62酸酸甜甜，好開胃，特別仲有啲果仁，屋企老人家都鍾意！推薦：4.5/5 （必食之選）蝦頭油蒜蓉法包 $48雖然個名叫蝦頭油，但係一啲都唔油膩。一共有六大塊，蒜蓉味可以再重啲。推薦：4/5Combo小食拼盤 (小) $52春卷、魚餅、庶蝦、雞塊，一共四樣嘢每樣野都有兩件！味道都正常。推薦：4/5勁爆炒生菜包 $78肉碎炒得超級香、好惹味、半肥瘦豬肉剛剛好！生菜份量都唔少，包住啲肉碎食真係好好食。食泰菜，冇可能叫生菜包。推薦：5/5 （必食之選）馬拉盞炒椰菜苗 $72食泰菜，另外一樣必點嘢就係椰菜苗。馬拉盞炒椰菜苗真係好食，椰菜苗都算幾爽口，送飯一流！推薦：5/5 （必食之選）鮮蝦炒金邊粉 $88金邊粉相對其他餸菜味道比較淡，加埋少少檸檬，味道比較清新。用嚟配其他餸菜都可以！推薦：4/5整體黎講，呢個價錢食到咁嘅質素泰菜，絕對係相當抵！性價比超高。就算外賣自取，都唔影響食物嘅味道、質素。非常推薦