七喜粥麵小廚 (Closed)

一個星期後，又即係星期六，我又一次黎幫襯七喜。今次真係大陣仗，又驚塞車又驚唔夠時間醫肚，要搭 A12 由灣仔出北角，都係為左食餐好既。上次都講過，朋友介紹食鵝腸麵，於是今次就叫左以下兩樣野：1. 鵝腸麵轉伊麵底 ($21)本來鵝腸麵 $18，加三蚊轉伊底。上次食伊麵已經覺得好，今次都唔差。不過上次係沙嗲牛肚麵，湯底較濃，配伊麵效果好少少。今次又係碗麵鋪滿鵝腸，非常爽口。我本來唔食內臟，不過連續兩次都係食內臟野，真係俾足面試新野。2. 蠔油豆苗 ($16)食豆苗要等冬天食，油唔夠多又唔好食喎，自己煮又唔捨得落咁多油，於是見到就即刻叫一碟。今次既豆苗好靚，最緊要係蠔油唔會太多太鹹，不過個蠔油唔算香。全餐 $37，今次趕得切去上堂喇！

碗好細隻，粥較稀，但幾有味感覺同綿綿杰杰果種唔同，料幾多，我叫了豬潤肉丸粥，肉丸勁香豬肉味，好耐無試過了，豬潤亦唔錯，可惜粥少，我係早餐加午餐，都只係剛好，大碗的當然好的啦

上完德文堂，由灣仔趕去北角上西班牙文堂，好似走難咁，去到學校附近只剩番十分鐘，於是就近隨便搵一間食肆醫肚。入門口，檯檯都有人，除左大門口個張圓檯。都坐住先啦，只係食十分鐘之嘛，不過出面街得九度，開門閂門個一下又真係幾凍架。望見餐牌，沙嗲牛肚麵 $18，好耐無食過沙嗲牛肚喇喎！頓時心動……望埋下面，轉伊麵加 $3，又好耐無食伊麵喇喎！阿姐，唔該寫個沙嗲牛肚麵伊底！三兩分鐘之後，一碗熱辣辣冒煙既牛肚伊麵上檯喇，非常快手。喜出望外，好耐無見過一碗超多料既麵喇！睇下張相，牛肚仲多過麵，仔細一數，夾埋有十二條牛肚，條條都粗過一厘米。一入口，燜得好腍好入味，唔似得中下貨色麵檔咁，嗱到牛肚好似橡筋咁韌。呷一口沙嗲湯底，唔太濃又唔勁味精，所以唔會太口渴，亦唔會覺得太淡而欺場。至於伊麵，完全係無油溢味，又唔會煮得太腍或者太硬，韌度適中，非常好食。過往去某大酒樓食芝士龍蝦伊底，都係輸係個伊麵既油溢味，今次真係有讚無彈，非常出色。食下食下，真係料多過麵，食晒伊麵都仲有半碗牛肚，真係極之豐富。連埋轉伊麵都只收 $21，物超所值。雖然只係食左十幾分鐘，滾水淥腳，但係真係開心到不得了。順帶一提，杯紅茶真係即沖熱辣

朋友約食晏，提議去北角新開的七喜試試。以前都有幫襯過位於鰂魚涌的七喜，大概知道都係主打粥麵。食晏時間，大部分的北角食肆都勁多人，呢間新店都唔例外，好在我地得兩個人，可以即時入座，不過環境超迫狹，圓檯配圓櫈已經坐得唔多舒服，檯與檯之間仲密得好交關；店主為左招呼更加多人，居然再在非常迫狹的環境中加多一張摺檯，呢張打開的摺檯凌空飛越我的頭頂再空降落隔籬位，實在驚險！ 至於食物方面，我地分別叫左鮮蝦水餃麵（18元）和京都炸醬麵（18元），另加炸鯪魚球（20元），而我又驚口渴，再嗌多杯凍奶茶（12元）。講真，麵的份量真係好細，我朋友的炸醬麵尤其少得可憐，佢未食已經話一定唔夠飽，食完要出去買包雞蛋仔醫肚。我的鮮蝦水餃麵只有3粒水餃，雖然都算大粒，但同樣都係唔多夠喉。好在我地叫左碟炸鯪魚球，即叫即炸就熱辣辣，好好味，可以話係水準之作。基本上，價錢都係算貴，可能因為佢無套餐供應，若好似我咁又食麵又想飲野的話，最低消費都要30蚊（麵要18元，再加凍飲12元），但麵又唔夠飽，再加小食，就要成40元，真係唔算好抵食。

夜晚放工，一個人，凍冰冰，行過雞蛋仔檔旁邊的七喜，就二話不說入去醫肚。去七喜咁多次，未試過「瀨嘢」，所以此店在北角開張不久，就有一批熟客。最正是炸鯪魚球，乒乓波咁大個，熱辣辣六大個，蜆芥醬又夠大碟；連出面好少有的脆鯇片都有得食，點辣椒豉油very good，而且夠爽脆，所以叫幾次都只係食到一次。另外，這裡的水餃同牛腩都好好味，有時唔太肚餓，食一碗已好滿足。今晚，天氣凍，點了艇仔粥和咸肉糭，艇仔粥冇乜肉碎，但豬皮同鮮魷都好足料，埋單三十元，回家的路暖笠笠，已是物有所值。

放學都成十點幾,又唔想食茶餐廳, 就試下 e 間小麵店.食完覺得唔錯,值得一試再試.雲吞麵好足料,湯底唔錯,飲完無口渴既感覺,可以飲多幾淡.雲吞係自家包,鳳尾雲吞,水準有返咁上下.魚皮就切得大塊左少少,好難一口一塊咁食.如果切細少少就 Perfect.同埋都試過佢地既腰潤粥,唔錯.腰潤都係煮得剛剛熟,完全無過火位.有水準.

相信這店在這裡開了不久，因上次來北角買雞蛋仔仍未有。以前在灣仔華潤附近食過，不知是否同一店。點了一個鮮蝦雲吞撈麵$25，麵質爽及沒有鹼水味，來時祇見三粒雲吞，以為與劉森記一樣，食落才發覺有些給麵蓋著，共有六粒，每粒雲吞都有鮮蝦，蝦肉彈牙，麵底有白菜仔墊底，另跟上湯一碗，飲落不覺有味精，但沒有大地魚的香味。收費與品質都相附，地方整潔，應會再來。