味皇餐廳小廚 (Closed)

去骨海南雞飯你食得多去骨沙薑雞飯少有啦掛同海南雞既分別在於一個奄咸蒸既～ 一個就係用煮水淥熟既～當然醬汁都唔同啦雞本身都唔錯，唔肥皮又夠爽口，最憎入口一pat野咁去骨雞一般都好似比較焾咁其實係有秘訣，去骨後最好用刀拍佢一下先切可以將纖維略為打鬆～咁就連雞背脊都可以滑滑啦～可惜....呢度做漏左呢下…好在隻雞仲年輕～都OK～啖啖肉既沙薑，又確係爽既～40蚊，有埋雞腳湯飲～算係咁啦～

午餐於味皇，點了一客海南雞飯作午餐。海南雞只有四至五件，感覺少了一點。雞件已去骨，吃起來方便，但口感略韌，並不夠滑口。味道清淡，有欠鮮味。加上油飯不算特別香口美味，此店的海南雞飯不作推介。

平時都有吃開味皇, 今日黎呢間試下, 叫左泰式無骨雞飯.. 好一般..d飯太硬..反而老公叫個炸醬吉列豬扒飯又ok好吃喎本來都合格..最弊+6蚊有杯特飲..衰好奇..叫左2杯荔枝QQ乳酸 & 芒果QQ乳酸... 甜爆!! 每一杯溝左2大杯水先飲得落!! 個亞姐可能以為我地呃水飲!!仲有, 間野超多"蚊之" 仲有烏蠅!! 嚇死人! 以後都唔黎!!

服務：1)　雖然只係外賣，不過電話落單時都已經覺得姐姐仔態度好，效率高。2)　味皇既外賣速度真係驚人。由我打電話開始計到我去到佢個舖位只係用左8分鐘，但係我要既食物已經包好哂等我。3)　去到餐廳見到所有姐姐哥哥仔都好落力，好欣賞佢地既服務態度。味道：　草莓煙鴨胸配香飯：嘩，同傳單上個樣一樣架！份量十足，可以話係＂唔打得都睇得＂，賣相滿分。其實個飯唔係好需要分開盒裝，建議味皇可以環保d用少個盒。暖暖既飯好香。鴨胸都係暖既，肉質唔算特別嫩滑，不過一d 都唔嚡，ok。配甜甜既士多啤梨汁幾得意。

去年十月尾，女友智慧齒發炎，收工後陪她去灣仔睇牙醫。預約時間是晚上八點，醫牙前，先在附近找餐廳醫肚。在街口的恆生銀行轉入灣仔街市，路經味皇餐廳小廚，見環境夠新淨光猛，就這裡吧！女友牙痛，不能吃多，選擇了常餐 ($30)，包括鮮茄牛肉通粉及炒蛋多士，貪其不用細嚼，容易落肚，我則要了無骨海南雞飯 ($35)。海南雞飯一向是味皇集團的主打，雞肉去骨，皮薄，雞肉只是一般，未算滑溜，更有點鞋口。醬料不是正統的三色醬，味帶酸甜，不過好似幾油膩，不太吸引。油飯色水極黃，倒算入味，但飯粒煲得較淋，無乜咬口，應可以做得更好的。常餐的炒蛋多士沒特別好說，而鮮茄牛肉通粉的湯底以熟茄煮成，茄味十足，採用的通粉是細細粒的那一款，入口 QQ 的，很不錯，反而鮮牛肉切得粒狀，肉質卻太韌太老，比較失望。餐飲要了熱華田及凍奶茶 (+$2)，後者放了太多冰粒，味道好淡好水，是茶記水準以下的。事後，牙醫開了些消炎藥給女友，原本打算待牙肉去腫後再作仔細檢查，但至今已時隔三個月，女友仍尚未覆診，牙痛先識睇醫生，真係比佢吹漲！

16-10-2009是日「下場」喺灣仔, 先搵個地方醫醫肚. 原本想到大有附近, 途中路經呢間茶記被掛喺 display 內的一隻二隻雞吸引了, 又試試. 叫了無骨沙薑雞配白飯 ($35) + 熱奶茶; 朋友就食燒豬頸肉配飯油飯 ($35) 飲凍檸蜜 (屬「特飲」, 需加 $6).先嚟奶茶, 用金屬杯 serve, 熱到燙嘴 奶味 vs 茶味近乎 2.8, 茶澀味濃烈, 飲落異常嚡口, 罕有的飲唔晒. 唔掂! 再嚟雞飯... 去骨雞件油光滿面, 雞皮薄但唔爽口, 黑肉夠滑, 白肉就超級硬實嚡口, 咬到牙骹軟了 肉本身無乜雞味, 蘸點沙薑汁會較好, 不過我覺得 d 汁太油又太鹹, 唔太喜歡. 墊底的白飯就又削又軟撻撻又無米香, 應該係品質麻麻 + overcooked 的結果, 唔喜歡.試了少少朋友的豬頸肉, 幾香幾爽口, 但太乾了; 又試了點油飯 (定係「雞汁飯」?), 唔「油」, 但都帶淡淡香味, 亦較白飯飽滿煙韌. 酸辣薑茸就不錯, 多酸少辣, 但用嚟蘸豬頸肉 / 雞, 幾惹味的.食物一般, 茶記環境就幾乾淨又好光猛, 冷氣仲超級大, 離開時隻手凍到呢 阿姐們

友人介紹，姑且一試。一試便後悔。貴又不飽。「食人唔吐骨」？新店似乎是剛剛完成裝修，成本擬似轉價於消費者。接近 $40 的一碟主菜雞 … 份量 … 還以為是只頭盤而已。什麼都貴，但貴起來又肉質不入味。理想價錢：應該是$32 吧。

本打算試味皇魚蛋粉,最終卻來了另一間味皇.見這裏像泰式店有專門切海南雞的角落,又推介這裏的海南雞叫宮廷式,像是很有信心的樣子,便點了一客.不用3分鐘便有的宮廷無骨海南雞飯,賣相和坊間的無兩樣,只是雞肉一看便有點擔心.傳統泰式海南雞,皮和肉一塊塊的連在一起,而肉的顏色則白中帶黃.但我面前的一碟,肉是白雪雪的,咬下去和橡皮膠差不多,根本咬不開,又嚡又無味.醬汁只有一種酸辣汁,太單調了.友人上次試過咖喱說不錯,結果點了日式咖喱吉列豬扒飯.日式咖喱跟用咖喱磚煮出來的差不多,沒甚麼驚喜.但吉列豬扒卻是出奇的好,豬扒外層炸得香脆,而內裏的肉卻保持鬆軟,只是咖喱汁太少,最尾有點乾哽.當初對海南雞帶著太大的期望,最終卻變成了吃過最差的海南雞.侍應三催四請的落單,可能是因為9點後有宵夜餐,想我們快快在9點前落單吧很差的海南雞本來應是哭面,但吉列豬扒為他拿了不少分數,就一個OK吧.下次還是試魚蛋粉好一點.

連鎖經營，招牌寫着這是第十二分店。可以開到那麼多店子，心想不會太差吧。宮廷版的海南雞，已去骨，不過切得太幼，甩皮雞胸肉的賣相不甚吸引。幸好食落雞肉只是有些少鞋口，而且有件雞翼位，滑滑的，算可以的了。隨附的所謂海南醬，是微辣的酸醬。不理是否正宗，好味就得。最差是個飯，只有丁點香。有色水，欠味道。炸醬與吉列豬扒的配搭，我倆是頭一次吃。兩大塊剛炸起的豬扒，熱騰騰的，咬落又不鞋韌，可以收貨。可惜另一主角炸醬，不夠香亦嫌不夠辣，說是肉醬比較貼切。期間索到隔離檯的咖喱好香。早知要咖喱吉列豬扒好過。

2008.10.01 (三) 回歸十一年才首次到會展觀升旗禮，名副其實的 "遲來" (普通話)來唱 "起來..." (普通話) 早茶後到灣仔藍屋及舊灣仔街市遊歷，途經此分店 無敵J 提議在此午饍，門外老大的圖片介紹其主打食物 ，我與主並無異議，況且試新野實是我的 午飯套餐款式不少，順序頭一﹑二﹑三的三款雞飯餐試齊晒 去骨海南雞 $33去骨當然易吃，唔洗 "LUN" 骨極啱懶咬一族(就像我)，雞肉少少滑﹑雞油飯色澤偏黃如像加了人造色素似的﹔味道一般去骨酸辣雞 $33混入酸辣醬的雞肉似手撕雞模樣，雞肉上有花生粒點綴，賣相也倒有觀賞價值，令人口水慢慢在口腔溢出﹔味道是三款雞之中較好的鹽焗雞 $30沒去骨的雞件確實係骨”參參”，雞味是有的但咸味不夠，伴碟的醬汁味道又怪怪的，不吃也可味皇...差矣

行左幾間鋪都有排等, lunch time 都真係無計! 到呢度, 等左幾分鐘就有位.之前都睇過呢度的食評, 好似都ok. 我地點左無骨海南雞飯同紅炆排骨手搞麵.兩者賣相都ok. 雞肉幾嫩滑, 油飯都幾夠味. 唯獨是上檯時, 碟飯已有點凍了. 我的排骨麵幾大堆頭, 小排骨都幾多, 但有豬皮就怪怪的, 可能係我唔食豬皮的關係啦!!! 湯底頗油, 味道欠了點鮮味. 排骨無咩味但幾腍. 手搞麵幾煙靭, 算唔錯. 下次可以試其他的配搭.呢度環境ok, 卡位算闊落, 價錢適中. 可再來試試其炸醬扒 (炸醬+雞/豬/牛扒).一提, 服務員態度不錯. 在繁忙時段也沒有黑口黑面+趕頭趕命.

8月2日,同呀比去動漫節計劃泡湯~ 天氣極度熱死辣辣之下又唔想再周圍行就走咗入黎呢度食個lunch先! 嘩~ 周圍都係d麻甩佬呢~~~::: 清雞湯雞扒米線 + 凍檸茶::: $26+$2首先, 雞扒蔥粒同米線唔會搞埋一齊, 賣相乾淨企理~ 呷一啖主打既雞湯, 果真有淡淡雞味滲出, 不錯! 米線彈牙, 伴碟既韭菜生菜夠晒青脆爽口, 係正菜黎架. 雞扒煎得乾身. 咬落嫩口, 最讚既係就算浸落湯度咁耐都依然保留煎肉既香味, 而且個湯都唔見有雞油泛濫!! 成個米線感覺好清好健康, 但係又好好味wor~ 推介!!凍檸茶都頗有水準~::: 吉列豬扒炸醬飯 + 凍奶茶 ::: $30+$2炸醬叫得做秘製, 一定要叫黎試下, 原來炸醬就即係肉醬, 完全冇分別~ 加埋塊炸豬扒, 都算有心思… 炸醬味道唔錯, 撈飯都好食. 吉列豬扒既肉地都幾嫩, 炸到熱辣辣幾脆~ 不過可能d炸油之前炸過d酸野, 食得出d炸粉酸酸地, 如果唔係就非常好~ 都值得推介~總括黎講非常不錯~ 環境總算乾淨企理, 冷氣夠又有電視睇~ 唔怪之得咁多麻甩佬揀黎呢度開飯!

之前女友0係北角返工, 有時夜晚會同佢0係果邊味皇食飯. 價錢唔算好貴, 食品水準不錯. 灣仔都有兩間味皇, 另一間粉麵, 三間我都幫襯過, 水準亦都 keep 到. 太和街呢間係新開既, 初頭仲以為係"老翻店", 入到去發覺 menu 都一樣. 又有大 LCD 電視睇, 正!shop manager 係一名留尾金毛男子, 但服務極好, 態度亦十分友善. 十分主動為我地服務. 食物方面, 依然係"味皇"水準啦, 不過餐具有點唔乾淨, 要扣分.地點亦唔起眼, 如果唔係有大大個招牌真係睇唔到唔奇. 我覺得服務來得比食物質素緊要.