文記清湯腩‧咖哩腩麵家 (Moved) New Location

係元朗如果想食清湯牛腩除了彪記之外, 就要數呢間如果比埋湯底, 就肯定係文記嬴晒平時食魚蛋, 雲吞, 牛什河等基本上湯底都係一啖起, 兩啖止但文記既湯底做得好靚清得來唔會過咸, 又唔油膩值得再來試

30-6-2007 1435以你地咁識得食及見識廣博，一問到係元朗邊度食牛腩出名，通常頭三位指定建議一定係嘉麗園、彪記或學記，不過我個人來說有另一個推介，就係呢間，特別在用中藥藥材為湯底，睇下有乜咁巴閉。位置並不起眼，其實佢就係乳豬大王後面。入到舖時剛剛落大雨，裡面只係得一檯客，真係好彩。黎到當然要試佢地既湯腩，但想要既爽腩及邊腩今日冇貨，唯有叫坑腩，又想試佢地既白蘿蔔，侍應話可以用蘿蔔代替粉麵，唔駛俾多成倍錢叫碟剩坑腩。上到檯後，絕對係一碗平平無奇的白蘿蔔坑腩，份量亦唔多，湯幾乎沒有肥油。第一時間係試佢個湯，果然有好香及濃味的藥材味湯底；然後再試牛腩，亦有鹵水香味，沒有渣，在左面亦有兩舊牛脂肪(如圖示)，望落好肥，食落唔肥，比起九記肥到怕既脂肪感覺好得多。雖白蘿蔔食落有少少渣又冇天然清甜，但藥材湯底同牛腩味道混埋一齊夾到個味又好食，絕對值得再來，當然係試下佢個咖喱。連喜歡食湯粉麵的曾蔭權特首也到此一遊(有相貼左係舖)，可想而知質素去到邊。

今日下晝同同事lunch去試, 入到去店鋪環境可以,感覺唔錯。自己叫左最standard的清湯腩河,另外有同事叫左邊腩粉腸河,同事話D粉腸唔OK,我覺得清湯腩幾好食,會再去。

這裡我之前也食了幾次，就清湯腩來說這裡算整得幾好食。上星期我和女友到此食晏，女友照舊要了碗清湯腩河，我喜歡試新野，於是叫了這裡聲稱的另一招牌菜：紅咖哩腩河。紅咖哩腩河是分開上的，即腩一碗，河另一碗的。不知為何，伙計捧來一碗紅咖哩腩來之後便好像忘記了我碗河，直至我問他們是否漏了碗河之後，他們才急急忙忙捧碗河來。紅咖哩腩和河捧來的時間相差最少７、８分鐘，伙計的質素有待改善。講番食物，清湯腩河算保持一貫水準，牛腩既嫩且腍，但又不會失去咬口；湯底清而不淡；河粉則無甚特別，算是不過不失。至於我碗紅咖哩腩，紅咖哩的確幾香，可是內裡的牛腩卻頗為硬身，若果閉上眼睛食，無論質感與味道都以為自己食緊罐頭回窩肉。總而言之，下次都係叫番清湯腩河算了，唔好亂試新野。

前幾日媽咪介紹國記之時路經此店，被佢傳來既陣陣藥材香味所吸引，所以第二日就拉埋男朋友黎陪我試。佢呢度個名係sell清湯同咖哩腩，就2款都叫黎試下。先講咖哩腩，係紅咖哩，味香，食落口你會慢慢食到佢既辣味，同埋佢冇椰汁(因為有椰汁我唔食的)，入面有onion and potato，吸收哂佢既咖哩味，牛腩係半肥瘦(小妹對牛腩既認識唔算太多，唔知佢係咩位)，入口甘香而滑，個人好鍾意。至於清湯，有淡淡既藥材香味，牛腩都係半肥瘦，咬落有陣好香既牛油味係個口度，不過最吸引我都係個藥材湯，飲落有陣陣既藥材味，另外再加多一個清湯蘿蔔，甜而冇渣，好好味。鋪面光猛，加上四人位比起一般粉麵鋪大，坐得幾舒服，食野途中，老闆娘仲走黎傾計講笑，老闆都係可以說笑之人，食得好開心，服務方面超讚。絕對有下次。