潮州魚蛋皇

Open Now

Now Closed

本人不嬲好喜歡食墨魚丸，剛剛下午茶時間，行開中上環走咗入去呢一間潮州麵店，唔係第一次幫襯㗎啦，二話不說就點咗墨魚丸湯粗麵同埋凍奶茶。凍奶茶好快嚟到，有茶味唔會太甜、但係我唔記得叫小冰真可惜！👍轉頭墨魚丸粗麵又到咗喇，墨魚丸入口彈牙，又唔會太實，有少少墨魚粒喺𥚃面，保持一貫嘅水準，冇令人失望。而粗麵相當之煙韌丶有口感，略為多咗啲，加上蔥花、芫荽少少辣椒油,真係絕配😙下次如果再經過，一定會嚟幫襯！有時候我都會買一啲貢丸牛丸魚片…返屋企自己煮😍

呢間魚蛋皇屹立左喺中環好多年，睇佢店內嘅裝修就知道有返咁上下年紀以前如果口淡淡冇乜胃口，我就會去食碗魚蛋米，佢啲魚蛋都幾彈牙㗎！不過有一次老公諗住試新野，叫咗牛腩泡飯，自此我哋就一試愛上首先泡飯嘅份量當然比米粉多啦，但係價錢又唔係話貴咗好多，所以都幾抵食今日我就食咗豬肉丸泡飯，豬肉丸都有幾多，我食咗一粒先記得影相，所以都有五粒，仲要粒粒都好大粒，吃完都幾飽。另外不得不提嘅，就係佢啲辣椒油，加咗啲辣椒油落啲泡飯/米粉度，成個味道即刻升華咗，正！

其實夜晚七點幾喺中環真係冇乜嘢可以食。 行咗兩行，我同我個朋友又唔想食粥。於是乎就走咗入去呢間食粉麵嘅地方。 眼見佢哋乜都有套餐，又有飯，又有麵。 嗰日我唔肚餓，我就叫咗一個淨魚蛋($40)，我個friend就想試佢嘅崩沙腩麵($48)。 佢個崩沙腩係幾好嘅，格肥格瘦。唔係俾啲碎腩佢。我個淨魚蛋都有六粒，我覺得佢啲魚蛋應該係自己打，好鮮。 加凍飲都係加$6一杯。 不過佢嘅環境真係幾污糟，我隔離啲枱啊啲用具，全部都係有漬嘅，根本就好似冇乜清潔咁，個Menu都立次次。 我個friend話話喎，呢啲餐廳自家形式，應該淨係專注喺自己食物上面嘅水準🤷🏻‍♀️