鐵板世家

Open Now

Now Closed

太耐無行金魚街，行完唔知有咩食，都係打算求其入間茶記算，點知原來有間裝修到以前港式西餐，係食鐵板牛扒。入去裡面，發現原來係深水埗老店馬德里餐廳嘅分店。餐包呢度無用普通圓形西式餐包，真係港式傳統好甜嘅餐包，有以前嘅感覺。羅宋湯傳統港式味道，好多椰菜同西芹，配帶辣味嘅番茄湯特別開胃。忌廉湯Creamy但無咩材料，好適合點餐包食，唔搽牛油。整體都唔錯，但相比之下比較遜色。鐵板牛舌拼肉眼牛扒 五成熟 $158呢個鐵板，特登無落汁，不過熱度一樣，攞開好多墊底嘅薯條，一樣足夠將牛扒煎到七成熟。配菜有西蘭花同車厘茄。肉同一般港式西餐一樣，都有鬆過，不過唔會完全爛曬，都有保留牛肉嘅味道。呢度嘅肉眼牛肉味足夠，唔會太硬。但呢度嘅牛舌外層比較硬，但多左牛舌，只係多$10，算係咁。鐵板T骨牛扒 五成熟 $148T骨係將牛柳、西冷牛扒同中間連帶嘅T字脊骨原個切出，同時食到嫩滑嘅肉同有牛味嘅肉。 加入黑椒汁之後，有黑椒香味，可以帶出牛肉味。意粉+$10咁重懷舊氛圍，但都係俾普通白洽意粉，有啲可惜。凍檸檬水 走甜 +$4*2=8牛肉太油膩，飲走甜嘅檸檬水比較舒服。甜品今次甜品係黑加侖子味雜果啫哩，口感比較鬆散。呢

講起豉油西餐，後生一代唔喺好知乜，但一聽就明，就證明你小弟咁，都喺有番咁上下年紀。早前晌太子食嘢，偶見呢一家「鐵板世家」，主打喺港式懷舊鐵板餐，之後再上網睇睇佢啲食評，感到好有興趣，所以，拉埋獨居老友嚟鋸吓扒。雖然呢個鋪位唔喺咩幾十年老店，但喺裏面裝修格局好有回到以前嘅感覺，好有復古懷舊風，尤其是啲紅白格仔枱布，絕對喺七八十年代嘅標記。佢唔喺咩茶餐廳，茶式唔會包羅萬有，但務求貴精不貴多，包括各款鐵板餐之外，就只有焗飯、焗意粉……等等。我哋嚟得目標清晰就喺港式鐵板餐。有一樣嘢好搞笑，坐低無耐，餐都唔好話未點，連食乜嘢都仲研究緊，侍應哥哥已經問你紅湯定白湯，相信點乜餐都包餐湯、餐包。餐湯、餐包叫得豉油西餐，揀紅湯白湯又喺另一經典，小弟就鍾意紅湯羅宋湯，因為酸香微辣好醒胃之餘，有大量蔬菜夠健康，飲落確喺好足料。跟湯送嚟呢一款餐包，真喺滿有情懷感，依家真喺唔多地方仲供應呢一款餐包。餐包非常之軟熟，微微暖，搽上牛油，配羅宋湯真喺經典中嘅經典。鐵板肉眼牛扒拼豬扒 $128呢度嘅服務好有香港人嘅特色，就喺快，兩份鐵板餐好快就送到上枱。我就多心少少揀咗肉眼拼豬扒配燒汁，啲燒汁淋落去真喺「咋咋聲」，好有

喺旺角東附近搵間睇得上眼嘅茶記都唔算太多選擇。行過通菜街見到兩間，網紅店「紅x」排晒長龍，隔離嘅鐵板世家主打鐵板肉類，主打香港懷舊風情，枱布用上紅白格仔，早餐都enjoy到，款式就同一般冰室唔大差別，而價錢都幾相宜。金牌早餐 $42沙嗲牛肉麵牛肉軟滑份量多，沙嗲醬濃香唔會太鹹，轉出前一丁仲唔使加錢，麻油另上好貼心羅宋湯牛腩粒麵個湯底酸酸甜甜好開胃，牛腩粒粒軟腍重牛肉味，仲帶有軟筋Steak Breakfast $42薄牛扒完全係違反商品說明條例，出面茶記嘅薄牛扒真係止緊薄，但呢度可能係比較佢晚市嗰啲牛肉，已經差唔多一隻隻手指頭咁厚，早餐比$42有鋸扒嘅享受勁爽早餐配菜七選二，一個揀咗炒蛋同豬柳漢堡，一個揀咗午餐肉同豬柳漢堡，豬柳漢堡厚身唔削又有肉汁好唔錯。套餐亦包括餐包，加兩蚊可以轉奶油豬仔包，大大份勁脆口！扒餐可揀熱香餅，配埋楓糖漿熱量爆棚，餐飲仲有得加錢轉紅豆冰，有滿滿能量開始新一天😆

一早收工之後要到旺角做facial就打算搵間餐廳食個早餐 依間應該係以鐵板餐出名，但之前一直冇試過就試吓佢嘅早餐質素先 每張枱都有紅白格仔嘅餐枱布 幾有feel羅宋湯牛腩粒通粉 配炒蛋漢堡扒奶油豬牛腩粒份量幾多幾香牛味 唔會太韌 煮得幾腍羅宋湯都好足料有蕃茄洋蔥薯仔味道十足每啖通粉加埋足料嘅羅宋湯好滿足喺一個美好嘅早晨 炒蛋都滑 奶油豬焗到好香脆仲有滿滿嘅花生醬奶油好邪惡但係都好滿足另外叫咗杯菊花薏米水飲落幾舒服好養生

今日中午去左呢間鐵板世家食飯，中午時份都幾多人，不過都未洗要等位，咁多人食一定好食了。入到去，裝修靚環境都乾淨，坐位都闊落，店員招呼同介紹餐牌，我地就點了兩個餐，價錢都好合理。點了肉眼扒配珍寶腸，揀了意粉黑椒汁送了白湯，凍奶茶。另外就點了鐵板肉眼牛扒配雜扒，有餐包，紅湯，燒汁，凍檸茶。先講肉眼扒配珍寶腸，好大份，肉眼很嫩淋，意粉勁大碟，配黑椒汁很惹味，好食。至於鐵板餐，佢在你面前落汁在鐵板上，很有義式感，哈哈，熱辣辣很香，口水直流，牛扒同樣嫩淋，仲有雞扒等，佢配薯菜，份量都係好多，好食，食肉獸嘅我岩晒。整體都好滿意，份鐵板都不用一百元，超值。

今日試咗兩款鐵板餐，分別係鐵板T骨牛扒配薯菜同埋鐵板什扒（豬扒/雞扒/珍寶腸/煎蛋）配薯菜，整體感覺幾滿意，性價比都幾高，特別係晚市仲有提子味布甸送，真係抵食！鐵板T骨牛扒，一上枱就聽到「渣渣聲」，熱辣辣嘅鐵板加上黑椒汁，要用紙巾擋住啲油彈，感覺好有儀式感。牛扒嘅份量都幾大塊，簡左7成熟，T骨肉質幾嫩滑，煎得啱啱好，外層微微焦香，切開仲見到粉紅色嘅肉，好juicy！配菜方面，薯條炸得脆口，仲有少少蔬菜，整體搭配幾平衡。至於鐵板什扒，真係好豐富，有豬扒、雞扒、珍寶腸同埋煎蛋，一次過滿足晒幾個願望！豬扒煎得香口，肉質唔會太乾，雞扒就比較嫩滑，珍寶腸好有咬口，煎蛋仲係流心嘅，撈埋啲飯或者薯菜一齊食，真係好正。同樣地，鐵板熱辣辣上枱，加埋黑椒汁或者燒汁，味道更加濃郁。另外，加$8就有特飲，我揀咗凍檸茶，解膩一流。餐湯係忌廉湯，味道濃郁，仲有熱辣辣嘅餐包，蘸湯食真係好夾。晚市仲送咗個提子味布甸，口感滑溜，甜度適中，作為甜品收尾真係好滿足。整體來講，呢個鐵板餐無論係味道、份量定係價錢都幾抵食，值得一試！

今日收工喺金魚街買寵物野，突然之間好想食鋸扒，即刻上網搵吓。見到附近有呢間專食港式鐵板嘅餐廳，睇落都幾抵食就走咗去試。雖然係茶餐廳格局，但入面都幾乾淨企理，仲有搶眼懷舊feel紅白格仔枱布！同鐵板餐好配合🤣🤣一入到餐廳坐低，侍應哥哥已經問我哋想飲紅湯定白湯。我同男友都係紅湯人，一致揀左羅宋湯～羅宋湯有微微辣味，幾開胃！餐包係暖嘅！鐵板方面，我哋揀咗肉眼扒拼牛舌同埋T骨扒。因為我低碳飲食唔食薯條，侍應姐姐仲肯幫我轉要淨菜，超級好!!一上碟都幾有驚喜！兩款扒都份量十足！肉眼扒揀咗五成熟，切開都真係粉粉嫩嫩既～不過因為喺熱辣辣既鐵板上面，所以食食下都會熟少少～肉眼扒幾厚身，啖啖肉，而且質地都幾冧，食肉獸應該都會滿足到！牛舌都有兩大塊，喺鐵板上面煎幾下，食落幾香！T骨扒又係勁大塊，依款就會肉味比較重啲，如果鐘意牛肉香味既朋友仔，推薦食T骨依款！最後想特別一提既竟然係配角西蘭花！應該有用上湯烚，食落唔會有草青味，而且煮得幾剛好，唔會硬掘掘！最後跟餐仲有啫喱甜品！人均$150嚟講， CP值都算幾高！

收工走左去太子買龜糧，突然好想食鋸扒，見到依間餐廳專做鐵板鋸扒，就入咗去食吓。一入去到見到所有枱都係紅白格仔枱布，好有懷舊feel!!!一坐低都未揀食咩，侍應哥哥就問我要紅湯定白湯，原來所有晚餐都包左餐湯同餐包！！揀左羅宋湯～辣辣地幾好味！！另外餐包都幾香，仲暖暖地🫶🏻主角牛舌拼肉眼扒上碟！雖然餐廳係茶餐廳格局，但係塊扒都唔算hea!大大塊，仲要叫五成熟，切開中間真係五成既！（不過因為係鐵板所以影出黎就再熟左少少😂)啲肉都算冧，牛舌都有兩大塊，抵食！食完仲有啫喱甜品！

由細到大都唔知喺旺角留低咗幾多腳毛，所以旺角對我嚟講係一種情懷，而另一種香港情懷，就係港式鐵板餐。呢個地方同呢種菜式，都令我引以為傲。呢度有間 2003年已經開咗嘅鐵板餐，紅色嘅格仔枱布，古典嘅鐵窗裝飾，最唔緊要係鐵板嘅嘶嘶聲，扣人心弦。 🍖肉眼配牛脷鐵板餐，肉眼扒做得好腍，牛肉勁厚，無根，所以食得好舒服，唯一缺點亦都其實系優點，就係好大塊，咁就算肉質幾腍，排牙要長期郁動，都總係會攰㗎，所以食埋薄切啲嘅牛脷就啱啱好，俾牙齒有休息時間，因為剛好相反，牛脷爽口彈牙，咀嚼嘅動作唔同咗，牙較就冇咁攰。兩樣嘢真係絕配。 🍖呢度可以揀燒汁或者黑椒汁，最期望嘅畫面就梗係將個汁倒落去個鐵板度咋咋聲嗰一刻啦， 好治癒㗎嘛。但係估唔到佢連甜品，都係會嚟到你面前，倒花奶係啫喱上邊，你知食嘢其實儀式感好緊要㗎喇。啫喱夠曬結實，裡面有勁多果肉，配合埋個花奶真係一絕。 🍖最後就係飲品，食鐵板餐飲紅豆冰是常識吧。但係佢嘅紅豆真係值得一提，我影咗張close up嘅相，你睇吓啲豆爆開個樣，就係咁樣先至可以起沙，有綿滑嘅感覺。 簡單一個鐵板餐，其實真係唔簡單架。

第一次嚟呢間鐵板世家，位置好方便好近太子站行3分鐘就到。我哋平日嚟食，都等咗大概10分鐘位，成間餐廳都坐滿晒人👍🏻👍🏻我哋坐低叫嘢食後，啲湯同埋餐包都上得好快。我哋兩個都叫咗羅宋湯，因為唔鍾意忌廉湯。羅宋湯煮得好傳統好好飲有少少辣，好酸好啱我口味。餐包亦都好軟熟，搣開點一點牛油就食。主菜方面，我哋叫咗一個鐵板西冷牛扒同埋一個鐵板肉眼牛扒加牛脷。餐廳啲牛扒都好靚好腍好易入口，牛脷都好腍好好食。我哋一個配黑椒汁，一個配燒汁。兩種汁嘅味道都唔算話好濃，所以好易入口，而且食完都唔會話好口渴。食鐵板牛扒，我次次都會叫凍檸樂，真係好match。估唔到餐廳仲有甜品送係好傳統嘅黑加侖子味啫喱☺️呢餐真係好滿足呀，下次我都會再嚟過😋👍🏻

琴晚同朋友去咗旺角嘅鐵板世家据扒，真係幾有驚喜！我哋點咗兩個鐵板套餐，分別係鐵板煎牛舌拼牛扒配薯菜同鐵板原條龍脷魚柳配薯菜，每個餐包餐湯、餐包、飲品同甜品，夠晒豐富。🥢開場嚟個紅湯，飲落暖胃又開胃，味道唔錯！配埋烘熱咗嘅牛油餐包，牛油滲入麵包，非常滿足😋🥢鐵板煎牛舌拼牛扒配薯菜呢個真係我至愛！牛舌煎得啱啱好，口感嫩滑，有啲微微焦香味，豉油調味非常入味。至於牛扒，叫咗七成熟，熟度掌握得幾好，煎到外層焦香，內裡仲保留咗肉汁，配埋黑椒汁，完全係港式鐵板嘅精華！薯條係我鐘意嘅粗薯，寧舍有薯味👍🏻🥢鐵板原條龍脷魚柳配薯菜龍脷魚柳係另一個亮點！魚柳煎得皮脆肉嫩，入口滑溜，加埋黑椒汁，啖啖肉好惹味😋🥢花奶啫喱杯最後甜品嘅花奶啫喱杯，雖然簡單，但味道唔錯！啫喱入面重有啲雜果，撈埋花奶食，甜度適中，食完成餐感覺冇咁膩，係一個幾好嘅ending。

今日出咗太子買龜龜糧，行到咁上下，見到有依間扒房，見到價錢相宜，而裏面又好似好多人咁，就抱住試一試嘅心態。入到去，就見到係四方格仔餐枱布，即時心心眼，因為真係好鍾意呢種懷舊嘅設計，見到佢寫住「港式經典鐵板餐」就想試吓係咪真係細個食開嘅味道。最後，我同老公分別揀咗肉眼扒同埋T骨扒，好快脆就已經有，而且最開心嘅係，個侍應問我哋要咩汁，當佢淋汁嘅時候，聽到嗰啲吱吱咋咋嘅聲音，真係超開心，同埋超級回味！第一個感覺係：真係以前嗰種鐵板餐啊！，食落啲扒都真係好港式鐵板餐嘅味道，超好食！ 5×熟的扒味道夠，又腍，正！最後仲有得揀餐飲同埋送甜品。雖然個甜品個人覺得比較甜，但都係以前細個嘅回憶。埋單兩個人計埋飲品都只係$300左右，我覺得如果想回到從前，我會再呢一間餐廳食扒😋

呢幾日天氣凍凍哋，食鐵板餐就最啱啦！坐定定之後，我哋決定叫一份鐵板蒜香雞扒 同 鐵板西冷牛扒，另外再加$10 追加意粉一份。套餐跟埋餐包、餐湯同甜品啫喱，因為鐵板餐本身配埋薯菜，份量都好多呀！想食其他嘢嘅，餐牌上亦有唔同嘅選擇，分別有焗飯、意粉、香濃馬來咖喱等等。鐵板上菜嘅時候要記得拎定餐紙呀～仲記得細個嗰陣，已經好鍾意淋啲醬汁落鐵板個時嘅滋滋聲呢😍 牛扒牛味香濃，中間仲係嫩嫩嘅粉紅色，保留適度嘅咬口。而雞扒大大塊仲係厚切㗎，肉質鬆軟，調味啱啱好，配上燒汁就緊加惹味啦！餐湯方面可以選擇羅宋湯或者忌廉湯，主菜未上之前，就可以食住鬆軟嘅包包同飲湯先啦～而最後出場嘅係甜品啫喱，仲可以加埋花奶，好似細個同屋企人一齊出街食一樣。✨鐵板蒜香雞扒✨鐵板西冷牛扒

晚市見佢有生意以為食得過，結果九唔搭八。一坐低就問要咩湯，叫咗兩個忌廉湯冇味，好似飲水咁。睇隔離枱羅宋湯都係水汪汪。想叫肉眼扒，侍應一句話冇，但係之後聽到至少四枱叫咗肉眼。改食雜扒，送到上枱佢話爭條腸，等咗一陣都未補上就同另一個侍應講，點知我一啖擺緊入口途中佢想成碟拎走。制止咗佢之後，主管溝通完過嚟話唔好意思，全部都係學生童工，心諗咩年齡關我咩事，重點係你要訓練班員工。雜扒黑椒汁又係水汪汪。$128一份雜扒，仲衰過大快活。另一個叫芝士焗海鮮意粉，淡到極點，意粉冇炒底，白烚兼冇滴乾水，海鮮都係完全冇味。凍檸茶、凍奶茶兩杯叫少甜，結果得杯凍奶茶有少甜。最搞笑既係杯凍奶茶佢插枝檸檬棍落去，篤乜？題外話，背脊嗰張兩人枱，一位男士入座，食到一半要同另一位搭枱，面對面^_^ 臨走之前，侍應上後來嗰位既飲品，倒哂落地⋯⋯ 濕拖完就算，等待意外發生。

熱辣辣的西冷牛扒加牛脷鐵板燒這道西冷牛扒加牛脷鐵板燒的餐點，無論從價格還是品質上來看，都堪稱價廉物美的代表。-西冷牛扒:這種牛扒肉質細膩，價格相對實惠，卻能提供高級餐廳的享受。鐵板燒的烹調方式保留了肉的鮮嫩，讓人一口咬下去，肉汁四溢，令人滿足。- 牛脷:作為一種獨特的食材，牛脷的價格通常比其他部位的牛肉更親民，但卻能帶來不同的口感體驗，讓人驚喜。- 羅宋湯:這道湯品不僅色彩鮮艷，味道酸甜可口，提升整體餐點的層次感。- 凍檸茶:這款飲品清新爽，為整頓餐點增添一抹清新。- 柔軟餐包:這款餐包，柔軟好味，還能搭配牛扒和牛脷，吸收肉汁，提升用餐體驗。總結整體而言，這道餐點以合理的價格提供了豐富的口感和美味的享受，讓人感受到真正的價廉物美。但係舖頭較細，繁忙時候要搭枱。