吞POT 雞煲火鍋.住家菜 (山林道) (Closed)

夜晚突然有急事要出尖沙咀，已經好累，唔想再慢慢搵位，想打邊爐，臨時見呢間有檯遠少少係山林道都照book。行緊過去，侍應已經打黎問我係咪會到，係就留返張檯比我，我地兩個即刻衝住上去衝到身水身汗，點知上到去原來仲有好多張吉檯。其實一心想食辣雞煲嘅，但老公最終揀左胡椒豬肚雞煲。湯底算唔錯，但味道可以再濃少少。雞唔係想像中咁好味，唔多入味，亦有d 鞋，亦無照片見到其他人相入面嘅咁多。特級雪花牛肋片，$198 蚊，成餐之中嘅敗筆：分量多或少呢樣野唔講喇，最緊要無牛味，真係唔值呢個價，同新星任食嘅味道差不多，只不過肉質無咁鞋。螺片新鮮嘅，四寶丸亦唔差，食得出係自家製手打唔係出面就咁入貨果種。爆芝響鈴亦都有驚喜，比普通響鈴好食好多。但好坦白講，打邊爐牛肉真係好重要。呢間d 牛嘅質素真係令我無興趣再去下一次。

呢間雞煲食左幾次，但好似質素逐漸下降。唔知係咪轉左手定轉左廚師，味道好似…..一去不返！第一次同屋企人食，超級好食😋所以都回頭左幾次。但慢慢好似愈來愈一般。唔記得影環境…..但見無咩人同男朋友坐左張圓枱仔。因為早晨鳥的優惠，配料同小食都有半價。種類都好多選擇！一坐底就有個醬料九宮格可以比我地混醬！唔洗我地走黎走去。我地叫左個BB辣麻辣雞煲，佢叫我地等兩分鐘就食得，啲雞好似熟得仔，老左。我平時食開米線食二小辣，呢個BB辣都覺得好辣。平時鐘意食川菜既男朋友都變左孖潤腸。建議驚愈煲愈辣可以夾啲辣椒出黎。安格斯牛小排一般，無特別大驚喜。正價$108 6隻蝦係唔覺得特別好食🙈所有配料都唔係特別好食同小小碟，但價錢偏貴。大檸茶都唔夠凍，茶底唔夠濃。食辣最想係飲凍野。最好食食最值得推介係芝士響鈴超級超級好食！！！！重要係即炸嫁👍🏻但唔記得影相最後一提係服務好好！我同男朋友食食下，有一枱人黎慶祝生日，超級開心🥳開心自然會講野大聲啲啲，但可能佢地坐既位置比較應聲。大聲到…我地連自己講咩都聽唔到 ，同埋分貝較高耳仔好辛苦，掃哂興。所以我地做左一次奧客同店員講想調位。店員都為我地安排幫我地搬到較舒適的位置

嘩，真心推介呢個花膠雞煲其實我哋呢一餐唔係志在食我哋志在吹水減壓八卦所以本身我哋都係諗住求其搵一間雞煲食吓吹吓水點知坐落嚟發現個Menu有花膠雞煲我哋幾個都異口同聲話要揀呢個同我哋想像中嗰啲咩辣雞煲係完全唔同因為嗰啲係冇湯，呢個係好濃烈嘅花膠湯然後我哋三條女雞都未食晒飲晒人哋啲湯真係好正然後倒清湯落去打邊爐我哋嗌咗唔係好多嘢粟米菜牛肉豆腐咁上下仲要啲牛食唔晒因為掛住吹水除咗個花膠雞湯我哋清晒之外其他嘢我地都食淨不過最後悔嘅係我哋應該係有花膠雞湯嘅時候冇嗌個粉絲🙈哎呀

花雕藥膳雞煲(半隻雞)$178雞煲係呢度招牌，一定要order。藥膳啱我哋啲，藥材份量好多，所以一拎到上枱已經陣陣藥膳味飄出嚟😊如果唔叫雞煲，都要叫雞食，因為呢度係食鮮雞件，唔係雞脾起肉扮鮮雞😂😂而且半隻雞都夠2-3人食，抵呀！脆肉鯇片$70脆肉鯇薄薄一片，吸收哂d藥膳湯底，鮮甜脆！蜆介鯪魚球$55估唔到呢度邊爐以外，有d小食、小菜叫，諗住叫魚蛋時見到有鯪魚球，呢個真係想介紹比大家：熱辣新鮮上枱，大大粒又彈牙，配埋果蜆介醬，無得輸😇自家制鮮蝦雲吞$75yes，大大粒自家出品，出面買嘅好少可用咁大隻蝦；而且蝦&豬肉比例均勻，夠鮮又好味～爆芝響玲$45(三條) / $75(六條)見好多人都推薦食，又真係第一次見芝士響鈴～估唔到兩樣嘢咁夾，真係好朋友嚟！d芝士溶溶地係響鈴入面，香口之餘又軟綿綿咁，好好食丫😚

打邊爐最緊要食材新鮮，加上呢度上樓嘅私房環境，悠哉悠哉咁食番餐，推推推！蜆介鯪魚球：坐低要先揀湯底，但太肚餓，嗌多個即食嘅小菜。鯪魚球感覺清爽少油，不油膩，蘸上自家製蜆蚧醬，更覺惹味，當餐前小吃十分不俗。藥膳雞煲：最後精選咗藥膳+雞；點半隻二人份量剛好，雞肉嫩滑；而且中藥味濃湯底，值得一嘗芝士響鈴：食店自製芝士響鈴，響鈴裏面包裹著一塊芝士；於湯底輕輕一拖上碟，芝士味道濃郁，入口即溶，必食！鮮蝦雲吞：真材實料，每隻都大大粒，包著原隻鮮蝦，味道新鮮。脆肉鯇魚片：肉質爽脆彈牙，味道鮮甜，不要焯太耐，否則肉質變老，影響口感。仲有自選醬油九宮格，yummy yummy😋😋

This restaurant was an awesome lunch dineout spot with family. Not too stuffy, well ventilated. And was quite busy around weekday lunch hours.Had an amazing chickenpot to start with, went so well with plain rice. The flavours were right on, even BB spicy was good enough, these guys really went crazy on the amount of chilli they add. Have to recommend the beef ribs - very generous full size portion! Didn’t end up taking photos as we were so hungry and just had to dig in right away. The sides and

每隔一段時間就會好想食雞煲，通常揀揀吓都會嚟返呢度，勝在雞煲選擇多又唔貴！醬料收人頭$12，九宮格基本野有齊哂今日天氣涼返啲，揀咗胡椒豬肚雞煲暖吓個胃，兩個人食半隻啱啱好雞件同豬肚唔會斬到碎哂，每人應該都有食到每樣六七舊，非常足料。仲有啲白蘿蔔片（入味超甜！）、三大舊粟米、芽菜同炸枝竹，食完呢煲都飽咗大半 😂打邊爐叫咗手打黑墨丸，食到有一粒粒墨魚肉，整體粒丸唔算好彈牙但食到鮮甜味（之前嚟試過手打蝦丸會彈牙啲，更推介）肥鵝腸真係好肥好肥好肥，見到一舊舊白色肥膏都差啲令我卻步。。。淥完出嚟啲肥膏整走哂，剩返塊皮咁簿嘅腸，好爽口！最後點少得油麥菜解吓油膩，好大盤又全部都好新鮮，啲菜葉翠綠色又爽脆，正！

呢到服務的哥哥仔同姐姐們真係好好呀野食好～服務好，唔怪得要上樓都多人幫襯如果五、六人飯聚都唔洗分枱有透明膠板隔一隔大家吹水無障礙如果有🎂，姐姐仲清潔好晒張枱🙌🏻Thank you so much一開始落九宮格調味料豉油稍為偏甜同埋呢個九宮格要幾枱share用到中段時間覺得唔夠豉油配料就要等一下叫左個滋補花膠🐔煲煲完勁多油片完油，飲啖湯、食個雞，正呀😋雜丸、雜餃、雜滑無太大特別叫左碟中價牛，好食啊👍🏻芝士響鈴人多一人一條先好叫如果唔係～勁滯、勁溜Albert葉炸魚皮好大份呀

味道香甜濃郁，而且雞肉滑嫩，湯好甜好好味，全煲食到清低，仲飲埋D湯，超正 另外食完雞煲再打邊爐，食材新鮮唔在講，佢嘅響鈴原來有芝士，超意外，非常好食其他疏菜姑類都算新鮮，加埋自己製作調味料，味道豐富👍

重點1: 麻辣入味見到食評好多人都食花膠雞煲，本身都好想食！ 但又想食啲麻辣原始風味啲嘅花螺雞煲🥘 所以都係叫麻辣味啦！ 如果唔係好食得辣，平時三哥叫開五小嘅，我諗叫BB辣已經好夠！ 因為會愈來愈入味🍗 兩個人叫半隻雞都好夠食，都見到又有雞翼雞髀雞胸嘅部分😁 啲雞都算滑😍 至於花螺都成二十粒，但覺得肉質偏淋 唔算太新鮮如果佢嘅食物可以分半份同一份咁叫就好。兩個人想試多啲食物，但啲分量又太多就好容易食唔哂。所以提議出半份 或者 一份就好😬

為咗慶祝朋友搵到工作，今日決定同朋友去食吞pot！吞pot一下！之前喺IG度見到有人打卡係呢間餐廳食飯，就俾佢呢個名吸引咗！雖然係平日去食，但我哋都有預早預約！大約夜晚7點左右，我哋就入咗餐廳就坐，侍應安排咗我哋坐喺電視附近，方便我哋睇奧運，好貼心！之後又攞左唔同種類嘅醬料俾我哋自己調製，有好多選擇啊，只需要每位$12！跟住我哋就嗌咗花雕藥膳雞煲，見到個名已經好吸引，我哋仲嗌左菜菜籃、烏冬同汽水！當花雕藥膳雞煲送咗枱面嘅時候已經聞到好濃嘅藥膳香味，煲得越耐越香添！入邊仲有好豐富嘅配料，有淮山、紅棗、杞子等，未食雞肉之前我已經即刻飲咗半碗湯，真係好鮮甜！再試埋啲雞肉，好鮮滑！菜同烏冬放喺湯底度都變得更加好食，我同朋友食完都表示好滿足呢！

成日聽朋友黎試呢間餐廳，今日終於有機會來試下。呢間餐廳位處較高樓層，視野開闊，環境都算闊落，唔會坐到逼逼夾好辛苦咁當日同朋友都叫左幾多野食，包括招牌花膠雞煲，四包丸，雪花肥牛，芝士響鈴，仲有叫左配菜同粉絲。一開始以為唔夠食，點知食到超級飽哈哈哈先講下個雞煲，雞肉嫩滑，雞皮彈牙，藥膳湯底都好夠味。呢個藥膳花膠雞煲真係好滋補，食完個身興恰恰，冬天黎食的話就一流。另外四寶丸係四種唔同肉類整成既丸，每一種丸都好好味，而且粒粒都好彈牙。芝士響鈴都係招牌，冇諗過響鈴配上鹹鹹地既芝士味道都幾夾。主食我地叫左粉絲，不得不概歎一句藥膳湯底配粉絲真係一絕。總的來講呢間餐廳食物味道不錯，尤其係藥膳湯底最啱冬天來食，食完即刻暖笠笠！

夏天熱焫焫都係忍唔住要去hot pot今次就簡左吞pot,主打雞煲，除了一般熱門辣雞煲，仲有女士恩物花膠螺片雞煲，我和朋友就一秒選中佢，夏天都要補一補！湯底濃郁，材料豐富，先喝口湯再食雞，啖啖精華，夏天打邊爐除了要有好湯底仲要夠冷氣，吞pot就冷氣足，我朋友仲覺得有d凍！由於今次只係得我同朋友二人，所以配料就點左牛肋肉，貪佢無拱肥，皇帝茶、十全大寶丸（一睇個名就知係好野！）每款手打丸都有兩粒，剛好二人可以一人一粒，試哂不同口味，仲有三款內含精選函料分別係海膽、黑松露和鵝肝；配塔新穎，口感特別，仲有就係打邊爐不可少的嚮鈴，佢哋的嚮鈴係即叫即制，仲內含芝士；放落雞湯底淥一淥，真係有流心芝士的效果，真係令人食指大動！至於飲品方便，我們選了西栖soda大大杯，不太甜，打邊爐唔飲汽水的另一選擇，下次真係要再試下佢地的自制餃子和手打滑仲有就係佢地的辣洒花螺雞煲！

同朋友去尖沙咀食晚飯，見好耐都無食火鍋，就book 咗呢間喺山林道嘅「吞POT 雞煲火鍋·住家菜」，一入到去就feel 到冷氣好夠凍。外面熱到爆炸，最怕要滴住汗咁食火鍋，餐廳冷氣夠勁真係好緊要😛打開餐牌，雞煲同火鍋湯底都好多選擇，我哋揀咗個滋補螺片花膠雞煲。一嚟到要試吓淡湯先～ 好好味呀，又勁足料，啲雞又好滑，花膠 & 螺片多到我哋都食唔晒😋😋個雞煲食到咁上下，我哋就請店員加湯，然後再叫咗幾樣火鍋料繼續食😬火鍋一定要食牛啦😆，我哋試咗特級雪花牛肋片，厚切又好香牛味😋。另外，一定要叫佢哋個自創爆芝響鈴，輕輕淥一淥 ，芝士就溶喺響鈴裏面，咬落去，外面脆卜卜，𥚃面啲芝士流出黎，好正呀！我哋仲叫咗手打丸&皇帝菜，都唔錯，幾新鮮。仲有杯西柚特飲，超大杯，配火鍋真係一流！

吞POT 雞煲火鍋位於尖沙咀山林道, 距離佐敦地鐵站約8分鐘路程, 餐廳座位寬敞舒適, 適合一家大細或三五好友共聚。 餐廳主打以雞煲火鍋為主, 雞煲辣度可任君選擇, 建議先叫碟炸支竹請餐廳於烹煮雞煲時一併放下, 炸支竹吸收雞煲原湯汁, 份外入味，比起放湯更加好味。雞煲雞肉非常嫩滑, 半隻雞份量二人晚餐剛剛好。 餐廳菜式份量比想像中大, 美國肥牛肥瘦適中, 有牛味, 有咬口, 屬於必點項目。手打蝦丸乒乓球般大粒, 非常彈牙，好食。