敏華冰廳 (荃錦中心)

Open Now

Now Closed

又到週末，又到日上三竿時，外出找吃，總是人頭湧湧，這裏更不在話下，幸好商場內這窄窄的走廊上有幾間毗鄰的餐廳，每間都點個牌子，“先到先食” ... 好，今天寵幸「敏華」！由於餐廳後方有麵包房，有師傅現場製作，所以蛋撻必定新鮮，況且，在外看見那糕點櫃的蛋撻 已十分吸引，於是一坐下，點了兩隻，沒有失望。正餐，娘娘點了比較輕型的常餐A3，“潮式沙茶牛肉公仔麵拼炒滑蛋雙腸及歐式多士”。那個公仔麵泡得久了，已不爽口，湯也不夠熱，不過湯底挺好，沒太多“師傅”，還是原汁原味的沙茶味味道，勉強算合格。多士、滑蛋、腸仔這些“無得輸”的出品，正常水準。我的正餐到了，“超大雞扒飯”， 雖然雞扒不是真的超大，但雞扒本身很入味，煎得很香，還熱騰騰的白米飯夠乾身，配上那甜豉油汁和蔥油，完美的配搭。

今日去荃錦敏華食早餐，我哋兩個座入卡位，有個姓梁主任🤬過嚟話要我哋轉位，要搭檯，話係4人位😡，當時10點幾，冇人等位，前面幾張檯都係坐住個2人，問佢點解？佢話可能會有人來😡😡，但門口冇人喔，我話要投訴佢，佢就趕我哋出門口。咁嘅垃圾都可以做主任，咁嘅服務態度，都係冇再幫襯。

晚市，等左半個鐘d野都未到。難以想像食茶記可以等咁耐，重點係好難食，雞煲翅d雞肉又小，同煲完湯既湯渣無分別。好懷疑呢間連鎖店可以咁差，浪費時間。好後悔無看到食評

早餐來講喺荃灣區都係偏貴，不過既然爸爸想食就滿心歡喜帶佢去食， 點知真係好失望😞沙嗲牛肉麵一嚟到嗰時嚇死我，成個公仔麵好似未煮熟咁！啲公仔麵都未分開一條條，三條公仔麵都黐埋！湯又唔夠熱，冇辦法利用湯嘅熱力整淋啲公仔麵😭😭😭😭鑒於已經食咗一啖，發現啲公仔麵好硬，又唔好意思叫人煮返熟啲公仔麵，因為咁樣好似唔合衛生，所以只可以打包拎返屋企煮番淋啲公仔麵😭😭雞湯通心粉都有一樣嘅問題，通心粉偏硬，不過都叫勉強食得落，如果兩樣食物都打包晒返屋企食，都唔知點解要落街食早餐成餐早餐最正常係個炒蛋多士一開頭點餐嘅時候已經叫左兩杯奶茶，等到差唔多食晒早餐啲奶茶都未到一睇原來佢哋打漏咗奶茶落張單度😟之後又要再等先有餐飲😩

朋友成日大讚敏華既多士同雞湯米，所以特登走黎試一下係咪真係咁正，我地叫左一個B5忌廉雞湯火腿米粉，併炒滑蛋同埋歐式軟多士，飲鴛鴦，一個B10 沙茶牛肉公仔麵，飲檸茶。忌廉雞湯其實對我黎講都幾算新奇，雖然又無覺得好食到嘩一聲既程度，不過老實講，比起普通既茶記既話，敏華呢個米粉的確會係更勝一籌既，一來，普通茶記無呢個湯底，二來，忌廉雞湯味道平衡得幾好，唔會膩，忌廉同雞湯味好夾，米粉質感又好。個滑蛋有好香濃既蛋味，又好滑溜，歐式軟多士真心出色，四邊香又脆，周圍同中心都係微脆加上內心軟熟，再加埋少少牛油，細心咀嚼，幸福，呢一刻，好想塗上花生醬同埋練奶。沙茶牛肉味道幾好，公仔麵就過淋，發到脹曬，缺乏公仔麵應有既口感，個人感覺都係個米粉會相對出色啲。早餐食到飽飽，真係人生一大幸福。有機會下次再來，希望試下菠蘿油。

一間茶記，等位耐（明明有位，阿姐唔帶位），叫左（茶）餐，15分鐘一樣野都冇，員工態度冷散， 其實好多分店都係咁既情況，真係一土火。如果佢定位唔係茶記都可能接受到。

平時好少嚟荃灣，今日因為工作需要嚟咗。諗住好快咁食個lunch，經過呢間敏華冰廳見到外面個招牌暗然銷魂好吸引咁樣，而且係咁多間餐廳之中唔使等位嘅一間，於是就入咗去啦。餐廳都算好大，每張四人枱中間都放咗一塊紙板間開，所以空間變咗非常細，食飯低頭嘅時候，頭幾乎要撞到塊紙板。Anyway，我趕時間所以馬上點了一碟招牌暗然銷魂飯$52，即是叉燒蛋飯。有三舊厚切叉燒，肥瘦適中，肉汁鮮甜。外皮有少少烤焦，幾香口。我又覺得唔係好暗然個隻。至於隻蛋，我期待佢會係流心嘅，但篤開嗰一刻失望左，蛋黃好似唔見左，只係見到少少蛋黃融合蛋白，中間係有半熟嘅，不過似係炒滑蛋d feel。$52 來講三舊叉燒有啲少，食完都唔係好夠飽。另外，留意到佢哋每日都有新鮮出爐嘅麵包，餐廳會有個計時器，到時候就會宣布有啲咩新鮮包出爐，感覺幾新鮮，下次會想試吓佢哋嘅麵包。

8-2-2020 (Sat)正月十五晏晝,同老公要買家居清潔,食咗個晏至去買,去邊喥食?咁啱我又要嚟荃錦一化妝品店攞嘢,攞完行嚟睇睇有咩食,見到呢間,咁就試吓啦.啱啱有張清潔好嘅卡位,睇完menu,老公決定要$52.00嘅煎蛋免治牛肉飯,我要$58.00嘅叉燒湯意粉拼炒滑蛋雙腸及歐式軟多士,大家都要熱檸水.老公嘅煎蛋免治牛肉飯速到,好耐冇食呢樣嘅我試吓先,味道同以前食過嘅一模一樣,好味.然後所有嘢都到齊,先食歐式軟多士,佢係好厚嘅,食落,外脆內裡非常軟熟,有別於一般嘅多士,好有驚喜.味道:5分炒滑蛋,睇佢平平無奇同炒熟晒,但食落好軟滑同多汁,厲害.味道:5分雙腸呢,原以為係普通雞肉腸,但唔係,似食香草腸,食一啖又有驚喜,因為有芝士喺入面,而佢味道又唔鹹,正.味道:5分叉燒湯意粉,見到個湯咁深色,都知好夠味,但對叉燒就有啲失望,一來薄切,二來偏全瘦,食落味道唔太鹹,蜜味都ok不過幸好口感冇我想像中咁嚡,而係鬆軟同有少少肥;意粉口感就啱啱好未過腍;湯就真係啱啱夠味.味道:4分熱檸水正常冇問題.抵食係2.8分

敏華冰廳在近年不斷開新分店，就連荃灣都有，仲要開2間，今日去宜加傢私買野，經過見到就入去試個晚餐，有驚喜就是，係門口睇餐牌既時候，門口位侍應姐姐竟然好有禮話慢慢睇，因為係我心目中冰室姐姐態度一直都一般，明顯間野有規矩，咁當然入去試啦，先睇睇餐牌先大致上都係一般茶記有既野，除左豬潤麵較特別，咁我就叫左個雜扒飯$62，我女朋友叫左個常餐$53凍飲+$3，常餐好快就有都有驚喜，多士是厚多，仲有飛邊，炒蛋夠滑，沙牛肉麵就正常，等多5分鐘，雜扒飯到豬扒好味，唔會硬身，好夠淋，至於其他正常，但覺得比較油，可以改善，晚餐$60位，價錢正常，味道可以，份量都夠。

貴既頹飯都算 。叫杯凍檸茶叫左十世都未黎 催單催左成3-4次都未有 仲要敷衍我。食埋個飯都仲要等勁耐先有 。可能整杯凍檸茶對佢地黎講真係好有難度啦～btw冇下次 請我都唔食

自己平時都好少食茶餐廳，但我知經過真係太肚餓，見到佢出邊招牌講感言銷魂飯好似好靚，就入咗去食。點知仲好食過想像中！嗌咗個黯然銷魂飯，一嚟到熱辣辣，好香。佢個叉燒同出面嘅好唔同，特別厚身，肥瘦啱啱好，加埋個秘製醬汁，令成個叉燒嘅感覺昇華隻蛋煎得好就唔使講㗎啦，加埋少少豉油，成個飯簡直帶你上天堂另外我哋都帶咗蛋撻，金黃色熱辣辣，外面係酥皮，鬆化嘅程度啱啱好，一流平時以為食茶餐廳都係食啲核核突突嘅碟頭飯，今次真係比到我唔同嘅茶餐廳體驗

平時好少行過荃灣，今日去到荃錦，見到有姐姐推介黯然銷魂飯，即係叉燒蛋飯，就入左去試啦！一坐低，叫左黯然銷魂飯，兩個岩岩出爐既蛋tart,同埋一杯杏仁霜！ 先試個叉燒飯，嘩，同平時食既叉燒好唔同，呢個飯只不過係52蚊，但係好有咬口，叉燒半肥瘦，同埋好有蜜糖香味！隻蛋仲可以溝埋D飯，d蛋黃同飯一齊食，係幾有蛋黃香味。跟住女士緊係要飲杯杏仁霜，熱飲係幾有杏仁味，唔似出面買既現成杏仁霜咁甜。兩個蛋tart當甜品，正常無乜大驚喜，酥皮都算脆。大家黎到可以試試個叉燒飯同飲杯熱杏仁霜

敏華冰廳越開越多，最近，在荃灣荃錦中心都開了一間。周末午市，客人超多，要排隊輪候才有座位。即使有位，亦只是搭檯。到底咩解究吸引到咁多客人嚟食嘢呢? 原來係呢個招牌黯然銷魂飯，同埋呢個超級雜扒飯。首先講賣相，兩個飯都係非常吸引。然後，論份量，絕對是大份。普通一個人，絕對夠飽。黯然銷魂飯的靈魂除了厚切叉燒和半生熟煎蛋之外，還有甜豉油。叉燒又腍又有口感，蛋黃流出，跟豉油撈在白飯上，非常享受。雜扒飯有雞扒、豬扒、腸仔和午餐肉，真係餸仲多過白飯。更特別的是，它不是配蒜蓉汁、茄汁或黑椒汁，而是配上薑油蔥，吃起來有另一番滋味。不過，如果要決選一個做冠軍，我會投黯然銷魂飯。另外，奶茶是較咖啡好喝。

現在香港的冰室買少見少，想找一間都很難，但係荃灣就開了一間我未試過入去坐低食，因為太多人午飯時間太多人等位，所以我試了他們最出名嘅菠蘿包，同埋雞尾包。佢哋好有趣嘅係，會有一個屏幕，打晒蛋撻、菠蘿包、雞尾包，佢哋嘅出爐時間，令到啲客人可以預計幾時會有新鮮出爐嘅蛋撻食呢間冰室嘅菠蘿包，有我手掌咁大，我自己隻手都唔細，都有一隻手咁大，好正，用咗好多時間去食，菠蘿包個皮，好脆，而入面麵包，唔係空氣好好食而雞尾包方面，每咬一啖，都充滿椰絲嘅味道，佢啲料鹹鹹甜甜嘅，令人一食再食，好上癮極度推薦大家去試下，等我下次試埋個叉燒包，HK$13 2個包

星期六，終於可以軽鬆小小去食個早～呢個早餐真係好得，睇相即明！沙茶牛肉公仔麵，真係有沙茶味，同好多塊牛肉，好味到震. 厚多士加煎蛋，個蛋煎到啱啱熟，多士外脆內軟，冇得輸！奶茶正路。足份量，老老實實，一個人真係食唔哂⋯