大丁小甜

Open Now

Now Closed

本人去落單要一杯椰汁蘭香子$25，隨後馬上同女員工講轉做椰汁黑珍珠$23 ，女員工仲話黑珍珠係細粒嘅問我得唔得我話OK冇問題，佢整完同我講$25，我問佢唔係$23咩，佢話唔係$23係$25.用杯裝要加多兩蚊，佢仲帶我入舖頭睇所有用杯裝嘅都係$25 ，佢話唔會係$23，佢話如果你用碗裝就係$23我話咁你要幫我用碗裝啦，佢話都係兩蚊啫，唔好咁計較啦OK好問題我唔同佢計較。 我返到屋企後發現我嘅椰汁黑珍珠其實係椰汁難香子，我拎返去同佢講點解係椰汁蘭香子，佢話黑珍珠即係蘭香子，我話你兩個嘅價錢係唔同你咁樣做生意即係唔老實啦，跟住佢話一向都係咁樣要收多兩蚊我話你嘅價錢表都冇寫到，佢價錢表淨係寫外賣盒加一蚊杯裝除外，佢話唔使寫，不嬲都係咁樣，態度仲要超差，唔係為咗兩蚊雞，而係呢間野做街坊生意都咁唔老實。

嗌咗兩碗甜品全部都有酸餿味🥭！！！ 其後發現兩款甜品酸餿味來源於個芒果。嗰陣味已經係去到影響晒所有配料嘅味道。食到第一啖完全都係極之失望。食咗一啖之後，我和朋友討論芒果🥭中，喺頭頂有個超級大嘅曱甴🪳🪳🪳飛來飛去，我和身邊的朋友一齊企起身行出舖頭外。同場有等待甜品的食客即刻轉成外賣走。 個曱甴飛來飛去，飛到個風扇度，之後又喺個甜品上面飛來飛去，最後停咗喺嗰張枱度。老細做完外賣之後問我哋：邊度有曱甴 同老細講完曱甴的位置之後，老細親手捉走咗隻曱甴。之後問我哋係唔係要埋單？？？🤬我想問：老細這是你的做生意之道？？ 我第一啖食到有酸餿味嘅甜品都自己認衰 完全冇同你講過。 發生有曱甴之後我都冇計較想睇吓點樣處理。 我只是食咗一啖的甜品，你就問我是否要埋單？？？ 我完全不能理解。之後老細見我黑晒面，先問我是否會從需要重新做一碗！ 我覺得好明顯呢個問題係唔需要問囉。希望大家千祈唔好幫襯。俾錢買難受和難食嘅嘢仲要受氣。🤮🤮🤮🤮🤢

首先個樣已經唔係楊枝甘露我係嗌楊枝甘露 加涼粉冇expect佢用涼粉同淡奶做base而芒果同西柚只係好似加配咁加落去就好似嗌咗一個 淡奶涼粉 加芒果 加西柚味道完全唔係楊枝甘露嗰回事

最近哩次去發現好似已經換左老世（之前係瘦瘦阿伯同佢個仔）。以前深夜時間想濕一濕口會諗起大丁，地點方便又可以暫泊車又可以吹水吹到好夜。但哩次去發現應該轉左老世係兩個女人同一個高瘦男仔。完全唔掂！表面上整頓過d餐牌阿剩咁，好似企理左.....但...當日4個人，堂食4碗，外賣1碗走，以前食開雜果西米、薑汁湯圓之類，但今次過去d西米全部連埋一嚿嚿，size份量都細咗。過程中見到有其他客叫左魚肉燒賣果d小食，其中一個姐姐夾夾下啲燒賣，其中有一粒跌咗出嚟喺出邊外賣枱張枱上面，之後另一個姐姐居然趁冇人嘅時候將跌咗出嚟嗰粒燒賣就咁掉返入個蒸籠！佢以為冇人睇到，一粒燒賣，污染晒成籠燒賣。好癲！

由細幫襯到大，但出品真心越黎越差上次嗌個熱紅豆沙已經覺得個味怪怪地今次嗌個熱紫米露，到手都淨係覺得碗糖水微暖食一啖後完全食唔到紫米露應有既味道淨係食到濃烈既酸味，我唔知佢係落埋椰汁落去叮熱搞到咁定係佢個糖水真係變壞左只覺得自己浪費左23蚊比錯左機會佢，完全失望，唔會再幫襯了

大件又抵食，佢地既全港獨有玻璃粉好好食，有蒟蒻嘅感覺，甜甜地有咬口，叫左一個雜果玻璃粉同埋一杯芒果奶西埋單都唔使$60😋因為專登揸車過嚟食，仲可以坐喺門口睇車食煙，係一個車聚同煙民嘅糖水好地方，唔怕抄牌，呢類型嘅小店越來越少，住九龍區嘅人可以試吓

想試新嘢, 特登search食評嚟試下, 結果完全不能 但服務態度是可以的。叫咗西瓜啜啜冰同芒果啜啜冰， 好似糖水嘅味道多過水果嘅味道， 尤其西瓜嗰一杯， 啜啜冰似淋小小嘅大菜糕， 食完唔會令人留下印象，亦冇飲完。至於個番薯糖水，真係扣曬分，番薯又硬又實都算喇，竟然加錢嘅湯圓都係硬嘅， 好食嘅湯圓咬一啖啲餡料就會流出嚟㗎嘛，呢嚿係實心㗎唯一嘅好， 係佢除咗有室內位置，仲有室外嘅位置可以坐多三枱， 對於我嚟講，試過一次就算了。

大丁小甜，街坊生意，得閒就會過黎食。每一份甜品都好多料，價錢也很貼地，大大碗都三十幾蚊。有好多唔同種類嘅生果。一大份可以兩個人share，很滿足。很推介呢～有冷氣位，都有室外位，任君選擇。

真係好好食嘅薑汁芝麻湯丸，薑汁夠辣，一大開蓋已經聞到好香薑味，唔太甜，湯丸皮夠咬口，同一般芝麻湯丸好唔同，芝麻餡好多，湯丸大細適中，天氣又涼咗，食完暖笠笠，話減肥但又突然好想食芝麻湯丸嘅我食完超滿足

幫襯左咁多年，一直飲開芒椰啜啜冰，之前都唔覺有咩問題，但最近係唔知轉左老細定點，難飲左好多😟芒果比得少，杯嘢淨係得椰汁+糖水味，玻璃粉又一pat pat，好似隔左夜咁，成杯嘢根本係用糖漿黎調味，完全搞唔掂。我fd買西芒椰玻都係一樣咁難食，希望老細見到呢個post可以改善番🙏🏻如果唔係真係好難再幫襯落去

趁着假期，無論幾忙都要同男朋友撐枱腳，食唔到晚餐都要食返個糖水。今次男朋友就帶咗我去石硤尾嘅一間是小店，呢度開到成11點幾㗎😌😌1, 鮮雜果黑珍珠玻璃粉(大)$40🤩🤩呢個玻璃粉真係真材實料，成兜野都係黑珍珠同玻璃粉，唔會剩係得啲水而冇嘢喺入邊。睇個樣就知勁多奶，同埋啲西果係好甜，好好味☺️☺️2, 椰汁西米露涼粉(小)$23😋😋呢個就中規中矩，同鮮雜果黑珍珠玻璃粉比較，我會揀前者多個後者因為份量極度多，精明嘅消費者梗係揀大碗啦🤣🤣咁我哋就嗌左一個大size同埋一個細size，睇吓有咩分別，同個份量相差幾遠，價錢有幾多。如果你食得晒的話，嗌大碗係好抵食😎😎

夜媽媽想食甜品，黎到石峽尾，就試下呢間，附近仲有貓貓玩。。舖面細細，先揾洗手間，問老闆有冇鎖匙，老闆答冇，再問先知唔洗鎖匙，真係急死了。芝麻糊麻麻地，椰汁冰粉都okay.

不久之前有緣路過一次哩間大丁小甜，覺得個舖名好得意，但未有空閒一嘗。與同行友人約定一個禮拜後再到訪。店內品項選擇相當之多，但望真啲你會發現所有嘢都差唔多，不過整體配料種類都唔少。我就揀左個細既幻彩黑珍珠玻璃粉（好好奇玻璃粉係咩），友人就嗌左個大既芒果涼粉。幻彩黑珍珠玻璃粉既雪糕既種類選擇都唔少，我就揀左綠茶。糖水一送到黎果陣我震驚了😂細碗一啲都唔細，大碗就真係好大碗！芒果涼粉啲芒果幾香甜，糖水底應該有落啲花奶，整體較甜但幾啱我口味。芒果涼粉仲有啲椰纖果，口感同口味都相當豐富。幻彩黑珍珠玻璃粉啲玻璃粉就係一啲類似寒天既物體，而整體真係幾足料，有幾個水果球同一大球雪糕。幻彩黑珍珠玻璃粉（前），芒果涼粉（後）最最最吸引人既係大丁小甜既超高性價比！咁大碗都係二十幾三十幾蚊，雖然品項較少但真係好抵！

喺深水埗食完晚飯，周圍行下，再過去大丁小甜都唔算遠。大丁小甜以前冇坐位，但而家而經有得坐，雖然舖面唔算大，但都坐到5枱左右，每枱3-4人，仲有舖外都有位。我自己覺得大丁小甜嘅玻璃粉最好食，而且感覺可以自由配搭咁，鍾意咩水果就配咩水果，最重要係價錢相宜。今次同兩個朋友食，一人叫咗一個玻璃粉。香蕉紫米露玻璃粉 - 好“傑” 建議飽嘅人唔好咁叫，係超級飽肚密瓜露薈玻璃粉 - 正常發揮幻彩黑珍珠玻璃粉 - 幻彩即係雪糕 + 西瓜 +哈密瓜 + 密瓜

今日經過石硤尾，見到一間隱世糖水小店，鋪頭座位有限，大概得六張枱，估計應該係做街坊生意。見價錢又平又好耐冇食糖水於是就入咗去，可能當日係星期四，又差唔多11點幾，都係得兩張枱坐左人。客人係要自己寫order然後遞比出面，一坐低見到餐牌裏面有玻璃粉，就覺得好得意，問咗職員先知原來質感好似蒟蒻，所以就膽粗粗order左黎試下。我叫咗個西瓜玻璃粉，裏面有落花奶，但我嫌花奶太多，Cover左d西瓜味，但賣相唔錯，西瓜係呈半球形，而且價錢好便宜，淨係$23，比起出面$30幾一碗又細d嘅糖水真係已經唔錯。如果住附近嘅朋友夜晚落去傾吓計都係一個唔錯嘅選擇