星期五放工同朋友食飯，佢喺Openrice買咗Coupon喺鰂魚涌食。本身以為餐廳喺商業區嗰邊，但原來位置比較近太古，亦即係怪獸大廈對面🌇。店舖名叫「Q Time Cafe」，第一眼望到就知係親子餐廳。
餐廳環境唔錯，除咗有遊樂設施之外🎡，四周圍裝修都幾靚，格調活潑，色彩繽紛。另外，呢度有落地大玻璃窗，出面雖然係街景，但亦感覺開揚。
我哋網上買嘅二人餐承惠$568🍽，已包加一服務費，屬中等價位啦。如果即場到訪嘅話，就可從晚市套餐中選擇。
安格斯肉眼排，🥩牛扒造型比較普通，不過食落又幾有水準。牛扒煎至五成熟，肉身呈粉紅色，外層就散發住炭燒嘅香氣，而且唔使蘸汁食已經夠味。件扒本身嘅質素都唔差，肉味濃郁，肉質軟稔，但筋位就稍為多咗啲。🍟牛扒嘅伴菜有薯條同沙律菜，份量多，食晒一定夠飽。
忌廉松露雜菌炒意大利粉伴香煎帶子，🍝菜式中嘅松露香氣四溢，忌廉汁較輕，油份控制得宜，所以整體唔會乾身。同時，麵質彈牙，富嚼勁，再加埋雜菇，更添口感🍄。香煎帶子亦係另一賣點，估計餐廳採用刺身級別嘅食材，每粒帶子大大隻又肥美，味道鮮甜。
小食拼盤係一籃炸物，入面有炸薯條、炸蠔同炸蝦🍤，全部均炸至金黃香脆、冇油淋淋，小朋友至愛，大人就佐酒一流。不過由於牛扒都配有炸薯條，所以感覺有少少重覆，或許可以考慮將薯條改為蕃薯條或雞翼。
是日餐湯係南瓜忌廉湯，🎃南瓜味道清甜自然，亦飲得到南瓜蓉。
二人餐奉送兩杯餐酒🍷，紅酒或白酒，小朋友耍樂放電時，大人亦可摸摸酒杯底，放鬆一下。
相片中嘅滑梯令一班小朋友盡興而歸😝。
總括嚟講，👨👩👧👦呢間親子餐廳各方面都幾好，食物味道不俗，並關注到小朋友嘅健康着想，採用優質食材，調味上亦較為清淡👍。另一邊廂，呢度仲有精品同玩具賣添。
Video
