新釗記茶餐廳 (Moved) New Location

翻看惡男食評，才發覺未試過這間茶記。趕得及早餐時間，早餐也有好幾款選擇，最後決定要最傳統的麵、蛋及多士。太陽蛋多士-原來是厚多士，不過烘得不夠脆，但中間有點硬，似隔了夜的；太陽蛋煎得靚，黃白分明。而老公的多士轉餐包，又硬又凍。我的叉燒湯意，叉燒雖是來貨，但肉質唔差，意粉又夠爽身；老公的沙爹牛麵湯底深深的，呷一口很濃味，不過只有辣沒有沙爹香。奶茶很苦澀沒有茶味。還是同區的銀龍較好。

零九年一月上旬公司飯堂之一，平日少來，多半是同事代為買外賣，粟米肉粒同番茄肉片飯是比較穩陣選擇。屈在公司一整天，要活動下了於是跟大隊來。從前叫金星的快餐，有波睇而小菜做得還過得去，是同同學常到的飯堂，早年關門大吉後轉了做新釗記，同同事研究過，應該是同一老細連鎖經營的。花多眼亂的套餐，有焗、有炒飯麵、有常餐，最後要了馬拉盞豬頸肉炆米。炆米極速上陣，大堆頭豬頸肉舖在炆米上，豬頸肉化學過，肉腍滑得要命兼出奇的吸油，隨量吃過就此作罷，米粉用上馬拉盞炒腍，只得辛辣的味道卻欠鹹香，馬拉盞若非過期，就是師傅加錯了辣油，吃了兩口受不住。侍應服務不錯，同事的餸味道不對辦稍有微言時，他會主動替換值得加分；但看同事的常餐，原來這裡的西煎蛋做得不錯，這類的早餐不會差！

本人因工作關係經常在呢區食飯,話說上次約左另外２個朋友lunch time食飯,本人由於早到就梗係等位先．等左１０分鐘左右比我等到個卡位,正想坐低之際，突然殺出個伙計叫左２個剛剛來搵位o既男仕坐低,無錯,人地係剛剛開始等位，我眼都突埋，望一望個伙計，佢仲聲大大同我講,話我未齊人叫我出去慢慢等。頂，一係你早１０分鐘話我知呢度唔齊人唔比坐低我都心服口服，仲要態度差到不得了。呢個時侯我２個朋友來到，真係嬲到震即刻同佢地走人，以後都唔會再來食。

聖誕正日三人行去睇戲睇戲後唔想再o係新都會同人迫就過左黎呢度食飯見佢新開又試下點左小菜餐粟米班腩跟凍檸茶($44+2)朋友叫左常餐西多士拼五香肉丁公仔麵($26)粟米班腩份量幾多兩個人食剛剛好最初見我同朋友仔兩個人叫一個餐仲會主動問駛唔駛俾多個飯服務抵讚只係略嫌d班腩層粉皮厚左少少朋友既常餐份量大不論係西多士定碗麵3個人食兩個餐都足夠

去銀行前搵野食,竟然又發現新大陸,繼續試新野!呢度卡位多多,2人/4人/6人都有,真係利害!獨佔4人卡位一大個,研究餐牌好幾分鐘,下午茶都幾多選擇,終於揀左呢個"香草雞扒餐肉蛋"茶餐。先來凍奶茶,又係大大杯份量,不過呢度用碎冰,感覺上比用大冰粒細緻;茶味算ok,不過不失之作,可以再香濃d當然最好。香草雞扒的確有用香草醃製,但味道好淡,無論咸味/香草味都唔多覺,唯一好處係面層炸得幾香脆,只係我都唔食皮,幾香脆都無幫助;餐肉薄薄兩片,煎得好醜樣,顏色黑沉沉好似煎起好耐,no good! 牛油多士牛油份量唔太多,但有牛油香,麵包角有d硬,普通;煎蛋竟然夠生,蛋黃漏晒出黎,用黎點多士好正!!以下午茶黎計,呢度價錢唔算平,不過勝在選擇幾多,有機會試下其他特餐、丁麵。服務方面大部份侍應都係中年阿叔,所以細心服務欠奉,又會企係客人隔離傾計,不過茶餐廳都唔好要求太高lu。