唐包點

Open Now

Now Closed

唐包點的分店越開越多，支持！因為夠大眾化，選擇多，啱港人口味，又唔貴，效率高！抵佢生意越做越好！員工好快手，好似已記熟洒食物位置，手到拿來，好快就將人龍K.O.晚餐時間，外賣帶番屋企與家人一齊食。魚香茄子飯：汁味濃，送飯一流！貫徹魚香茄子的風格，帶點辣，野味！章魚肉餅飯：最愛有馬蹄的肉餅，章魚味香，冇肥膏！新出的咖哩雞飯：有驚喜！雞脾肉嫩滑。咖哩汁香，唔算太辣。(有薯仔㗎) 嘿嘿，仲有埋甜品紅豆砵仔糕，好煙韌，唔太甜，舖滿紅豆面！真抵讚的外賣自取店！

頭先放工好肚餓又唔知食乜好之際，地鐵站的唐包點實在係好選擇，即刻買走可以返屋企同老公一路睇電視一路食，方便快捷！叫左章魚肉餅飯、北菇雞飯、燒賣同埋雞扎，驚唔夠飽仲叫多兩個包。先講兩個蒸飯配埋蒸飯豉油簡直一流，章魚肉餅飯冇得輸，不嬲都係我嘅至愛！雞扎估唔到咁多料，芋頭夠粉，仲有舊豬肚喺入面係驚喜嘅，食落都唔算好油。燒賣有四粒，同老公一人兩粒啱啱好。但最後嗰兩個包實在飽到食唔到，睇唔出啲飯盒咁細原來裏面都幾多飯，奶皇包同菜肉包都係留返聽朝整返熱做早餐！想讚下啲食物盒其實都幾保溫，又實淨，環保嘅我梗係洗乾淨之後再重用啦！

經常夜收工，多數都係買外賣返屋企食，搭完地鐵🚇、喺地鐵站見到好開陽嘅唐包點，就買了一些蒸飯糖水等返家食。原來這間唐記的食物多元化多種類，也有咖喱飯等類別，不過我最喜歡的魚香茄子飯就沽清了，就揀選了一個咖喱雞飯回家吃。先叫了點心-豉椒鳳爪，是店舖推介必食的食物之一。鳳爪非常入味，而且啲皮好軟，好味。這裏還有兩款糖水，就每款各叫了一份試一下。腐竹薏米雞蛋糖水質感好滑溜，成碗都係白色，證明好足料，而且又不會太甜，本人認為好味過出面糖水舖好多！這裏還有多款飲品任君選擇，我也點了一支無添加的香滑奶茶回家試一試。還有蒸飯系列，新鮮原汁原味，經過值得一試！

平時早餐都有買開唐包點幾點心包類，因為貪佢夠晒方便，即叫即有，仲要熱辣辣，有時仲會買返屋企當晚餐食。知道唐包點港九新界都有好多分店，啱啱做完嘢經過長沙灣地鐵站的唐包點，就看看還有什麼點心包類飯類選擇。驟眼睇門面已經見到好多食物圖片，見到都流晒口水好肚餓，而且又唔貴，屬於平民化價錢，難怪吸引咁多人買。當然唔少得買店舖最出名嘅菜肉包，熱辣辣一個仲有獨立包裝，買到返屋企仲係暖暖地。食落去麵包質感好軟熟，中間還有一舊大大件嘅菜肉餡，可以頂一頂個肚仔。雪櫃還有很多各式各款的飲品，還叫了兩支原味豆漿和奶茶。最後回家就是飲番薯糖水，番薯嘅份量都好多，而且番薯味道濃郁，非常鮮甜。難關我一向都有幫襯唐包點，因為食物的性價比高，所以一路keep住有幫襯開。

早排經過長沙灣唔知食咩好，落到地鐵站見到呢間唐包點，啲飯新鮮熱辣蒸好，放工時間聞到香噴噴，不如就係度買個外賣返輕屋企食啦！排骨飯啲排骨鋪滿晒飯上面，食落都幾有酒樓水準喎！肉質都ok蒸得幾滑。另外叫咗糯米雞，佢個糯米雞好抵食，係珍寶size, 大大舊肉好滿足燒賣都好大粒，平時口痕我就會叫籠燒賣當點心一路行一路食，所以真係好食得過！包點就一直都無得輸，我最愛就係叉燒包同菜肉包喇！貪佢地貨真價實啖啖肉！！

一直都有留意周圍都開咗好多唐包點或差不多名的鋪仔賣點心！如果唔係我仔成日放學買來食，我都未必想試！星期日自己食不如就試試佢，可能仲早，排一個到我啦！D姐姐好有默契快手快腳的，咁先做到好效果，客最like!原來有飯食嘅，內心在鳯爪排骨飯和豬軟骨飯爭鬥下叫咗有汁嘅豬軟骨飯!汁夠多又夠味，眼見得二件大豬軟骨？錯了，下面仲有多D肉，$29來講，D淋肉入味，抵到爆！怕食唔曬都要叫我仔放學成日order的焼賣！$17！賣相精美丫～ 足料嘅蝦，好明顯見到瘦肉，仲有菜墊底，完全冇投訴！鮮竹卷都唔係度度有，兒時的味道呢～ 正！見前面的阿婆買咗大大個包，睇清楚$7.5一個，就買咗個菜肉包同叉燒包第二朝做早餐！又得咼～ 料夠多，夠實在！抵過真他西餅店一陣風果D义燒包好多囉～估佢唔到，咁嘅價位仲老少咸宜～ 會提阿媽呢度有佢啱嘅嘢食！

今晚放工一個人食飯，搭地鐵去到長沙灣返屋企，經過大堂見到唐包點好多人排緊隊。過去睇下，佢哋嘅蒸飯同點心好似好唔錯，排左一陣好快輪到我，就買咗一個鳳爪排骨飯，雞扎同埋燒賣。三樣嘢埋單只係$60，分別係鳳爪排骨飯$25，雞扎$18，燒賣$17。返到屋企覺得啲點心唔係咁熱，看看包裝很方便可直接放入信微波爐加熱，合蓋上還有一個小孔，你不用打開蓋也可以直接放入微波爐加熱。鳳爪排骨飯的排骨同鳳爪都好入味，豬油滲到飯裏面，十分香，雞扎的材料很充足也很新鮮。燒賣也很不錯。整體來說我覺得水準很高。下次放工的時候一定要試試他的其他飯類和點心。

返工早餐同lunch 想食得健康好方便衛生，食物優質及價錢合理，我必定會揀「唐包點或唐記包點」。近日發現不論係港鐵站或街上都搵到唐記嘅蹤影，香港、九龍、新界，遠至南區都總會搵到一間，所以去唐記買早餐或午餐已經成為我平時必食好選擇。今次在長沙灣區開會，先早上買咗一個熱辣辣嘅“香菇雞包”做早餐，我愛吃香菇雞包，包面甜甜地，裡面餡料十足，食到啖啖雞肉，香口嘅香菇，真係好好味夠飽肚。到下午時間，我同同事都唔想同人迫，所以又走去唐包點買飯食， 秘製豬軟骨飯$28蚊，非常超值， 白飯同餸汁是分開裝，很乾淨衛生，份量十足，而且豬軟骨好淋夠入味。同事就食足料糯米雞都係$25蚊，相當抵食，真係好夠料。我哋兩個再加一個“燒賣”，而燒賣$17蚊有4粒，有豬肉味加蝦肉都彈牙，味道都不錯。我仲買埋豆漿，而同事就飲黑芝麻豆漿，每枝都係$9蚊，豆漿都有豆香，不太甜，而黑芝麻豆漿都不錯，夠味又不甜，非常健康。

今晚探夜班，順理成章買埋飯去食啦。唐包點見過好多人食，見佢會好整齊包包紙似食漢堡包。今晚買飯外，買個「中式漢堡包」啦。叉燒包 $7.5有1/3叉子咁厚，都有小女子手掌咁多啦。包左紙好高級咁，哈哈。紙既關係都環保。一半包肉一半叉燒，抵食！叉燒有少少肥位，都接受到。因為淨瘦肉就無咁香口，所以有d油位都好。包好好軟，點解咁講？轉頭就知。香菇雞包 $7.5我帶左返屋企做第二日早餐，叮返熱個包都仲keep到軟，真功夫！香菇雞包有黑芝麻係認住佢。一開包好清香冬菇味道，雞肉都夠一日之晨既能量！咖啡雞飯 $28質素拍得住大快餐店，佢價錢仲要平好多！咖哩都帶香濃，唔算太多油，可以加辣點更好。雞肉塊同薯件都有幾件。魚香茄子飯 $28依個餸最緊要夠飯，唔係點混汁清碗呢，嘻嘻！茄子無話係外賣店而煮得馬虎，軟身入味。辣就唔會，多油少少，肉碎又多多唔會乾淨淨。香米軟硬度岩岩好，好食，係扁身個隻。足料糯米雞 $25真係足料大份，成隻雞翼係入面！仲有幾多冬菇肉碎，又唔會太咸唔錯！糯米成呎厚，好飽肚。基本上食佢就一餐都得，share既都可以當點心。

咪仔老公同大部分既西方人一樣都熱愛廣東點心 每個星期日我地都必定會去茶樓飲茶 而佢既最愛就係包 叉燒包 奶皇包 雞仔包 只要係包佢都鐘意今晚佢黎接我收工 係地鐵站經過呢間唐包點 見佢雙眼閃閃發光 我就知佢想買黎試試 佢有蒸飯類 包點類 點心類 對於快餐形式既蒸點店佢都幾多選擇 我鐘意食章魚肉餅飯 就決定叫黎試試 佢想食咩就自己發版啦點知佢竟然叫左四個包 真係打算食包食飽 哈哈 但由於返屋企需要啲時間 啲嘢食都開始凍 我就用蒸焗爐蒸返熱啲包同飯咪仔老公分別叫左傳統既叉燒包 奶皇包 同埋酒樓好似無見過既紅豆包同埋蕃薯包 佢話奶皇包同蕃薯包最好食 因為個包好軟身啲餡好滑好香 唔會太甜 我就覺得蕃薯同紅豆幾好食 特別啲～我個飯都唔差 一蒸完已經聞到好香章魚味 肉餅唔會太肥 食蒸飯最怕就係啲飯濕到一pat pat咁 但呢間就算加埋甜豉油都仲係粒粒分明 抵讚我地都買左一黑一白豆漿 唔會太甜入口順滑 配包食就岩晒 不過佢既黑芝麻豆漿比較淡黑芝麻味 同我係加拿大買到既有啲分別 少少失望啦 哈哈

今晚要在公司加班，想買些簡餐來吃，想過便利店的叮叮東西，但又好像太頹，剛好想起地鐵站有間唐包點，供應熱辣辣的點心，即叫即取，又不用翻叮，感覺較新鮮，亦都快捷方便，便買回去和同事共享。鳳爪排骨飯$25一般也會選用少少偏肥的排骨, 吃著較為有油香肉香, 也感覺較軟嫩, 鳳爪做得很入味, 煮得夠軟, 兩個材料配飯已很滿足了, 是令人不能抗拒的盅飯。鮮竹卷$17有酒樓的水準, 沒什麼分別, 可說是出色, 餡料細緻, 配搭得剛好。山竹牛肉$17軟熟度不錯, 也是一貫的山竹牛肉味道, 可能偏濃味少少, 好像沒有喼汁供應。黑芝麻豆漿$9比普通豆漿更有營養價值, 女士的養顏恩物, 糖份不是太高, 不太甜, 又補鈣。糯米雞$25十分大隻的糯米雞，甚飽肚，用料幾多，有大件的雞肉，味道亦對味。

諗緊中午食咩，途經地鐵站，見到唐包點，就諗住買外賣返公司食。選擇好多，平時食開蒸飯點心，正打算揀蒸飯的時候見到現在佢推出新產品。居然有豬軟骨飯，咖哩雞飯同埋魚香茄子飯！于是想試下個豬軟骨飯。咁就打包左一堆返公司慢慢享用。地鐵站行返公司好方便，返到公司d野食都仲系熱辣辣。豬軟骨飯系米飯同豬軟骨分開裝，分量好滿足，米飯好香，豬軟骨好大舊，但好入味，燒得夠爛。如果晤怕肥，可以淋汁撈飯，好好味。仲有兩份小食，雞扎同鮮竹卷，都系新鮮滾熱辣，料好豐富，好正！

這幾天也是在公司晚晚OT，放工累到唔想郁。 今日經過唐包點見到仍有蒸飯賣，一於買來好好吃一頓豐盛便當，用美味食慾來舒緩壓力。鹹魚肉餅好足料，一打開膠蓋，香濃䶢魚香味四溢。豉汁排骨飯，排骨份量多，大大粒啖啖肉。包裝膠盒用凸紋設計，揸住盒吃也不易滑手。山竹牛肉質感爽脆有肉味。蒸鳯爪底層白蘿蔔吸收了鳳爪味道，是精華所在。每個包獨立包裝，唔會風乾表皮，食時又乾淨衛生。仍見到片片蔬菜混在肉餡中，真材實料皮薄餡靚。

我今日先發現我平時食嗰間鋪同我今日買呢間係唔同個喎😱今日逃工唔OT去interview 途經呢間鋪，勁肚餓即刻去買一個菜肉包，點知佢俾我個下覺得怪怪地雖然大家個價錢一樣$7.5但食開TK包點係膠袋今日見到變左紙袋？仲要個包有紙包住🤔我先醒覺原來係兩間唔同品牌但呢個包裝係吸引好多喎，又得意不過真心講TK包點個饀好食D，但呢個又唔係差嘅個包大家都熱辣辣，好軟熟T個包厚小小小小，所以饀小DD但都可以的👍🏻

昨天吃得太多腸胃有點不舒服，今天早餐想清一點。經過唐記包點 ，原來這裡除了蒸包、蒸飯、點心外，還有粥品！腐竹粟米粥 及 皮蛋瘦肉粥。粟米粥未免太過清淡，於是買了皮蛋瘦肉粥回Office吃。店員會體貼地問客人要不要調味料（鹽、胡椒粉）及餐具。粥品用耐熱膠盒承載，蓋面寫上是香港新鮮製造。皮蛋瘦肉粥份量約有八成滿，內裏有很多瘦肉、腐竹，皮蛋亦大大片，用料足。個人認為味道中規中矩，很難要求它們的水準好像粥品店般綿滑幼細！