原味棧 (Closed)

又一個放假前要OT嘅晚上，收左工就提議成班同事一齊食個晚飯。見大家都無乜頭緒就提議黎呢度其實係為左方便自己，約左人係黃埔睇I.T嘅午夜場。首先點左呢度嘅招牌火焰鵝煲。配料係海鮮併盤及手切安格斯肥牛。其他火鍋配料分左免費任點同埋收費單點，本身火鍋嘅分量已經好多所以我地都無再追加了。店員係鵝煲滾左之後立即加入二鍋頭並點火，視覺效果同香味都一流。之後再焗多一陣俾酒精揮發就食得了。鵝煲用左燒鵝製成煮得好入味，入口唔會好柴。尤其係裡面嘅豆卜同腐皮，吸收晒濃郁湯汁嘅味道同酒香，同事們都爭住食。鵝煲食到七七八八就開始進軍海鮮同肥牛了。海鮮併盤材料非常豐富包括龍蝦，鮑魚，海蝦，蟹以及各式貝類。因為湯底已經好夠味，食海鮮時完全唔使沾醬油調味。龍蝦鮑魚等等因為夠新鮮，食落彈牙甘甜。加上酒精嘅幫助將僅餘的海產腥味都辟走埋。其中貝類真係令人眼前一亮，無論係沙蜆，花蛤同螺都完全無沙同鮮甜。貴妃蚌除左大大隻肉質夠厚之外，而且入口爽滑口感完全唔似食緊貝肉。最後係手切安格斯肥牛，雪花雖然唔算特別多但好均勻。咁樣反而更加突出左佢本身嘅牛肉味，而且每片都切得幾厚所以咬落好有滿足感。蔬菜籃到最後差啲食唔晒，因為個量實在幾多