美心西餅 (萬事達廣場)

Open Now

Now Closed

晏晝上咗3個鐘堂，返到嚟美孚，剛行過萬事達廣場家「美心餅店」，口痕痕想食啲甜點，所以，睇睇有咩平靚正，買啲返去同老婆下午茶。晌餅櫃掃咗一輪，睇見有啲撻，只喺$9，抵喎，之前都未試過，就買其中較心水嘅兩款返去。杏仁菠蘿撻 $9其實個賣相烘焗得幾靚仔架，一身金黃，切開睇睇，滿以為有啲菠蘿粒或菠蘿片，原來只不過喺面頭有少少菠蘿果蓉而已，反而杏仁碎超多；咁佢個名用上個撻字，但睇落，兼食落，都似「孖寶蛋糕」、「磅裝蛋糕」一類嘅質感，口感較實淨，有蛋香，卻跟平常食到嗰啲搵牛油、麵粉搓成嘅撻皮喺兩樣嘢。法式蘋果撻 $9跟個菠蘿撻差唔多，只喺換上蘋果蓉，但都只喺餅面有一抹而已，餅心就純粹喺牛油蛋糕。可能你會問好唔好食，其實喺唔差嘅，只喺似食件普通嘅牛油蛋糕，比預期有啲「撻」Q嘅感覺啫。故此，如果你諗住以食一件果撻、脆撻嘅心態嘅話，應該會失望。相反，唔好被個名誤導，單純食件有啲果醬餡嘅牛油蛋糕，感覺會OK啲嘅。