Video
Read full review
2023-11-20
812 views
同太座慶祝周年紀念永遠係大難題，要特別得黎好味，好味得黎要環境舒適，舒適得黎又要唔可以太貴，資料搜集一輪後終於揀左呢間，真心有驚喜！呢間餐廳主打8道菜Omakase全牛宴，法國菜同fusion都試過，有D真係又貴又唔飽，你要食好少少又要加錢，呢間就好均真，每位只係$780， 飲酒先另收費，任君喜好。以經理講，我同太座食果個係餐廳啱啱11月先出新菜單，我當時都有少少擔心，怕同之前網上搜集啲資料唔同出事，結果當然係無事，仲好滿意。第一道菜就有驚喜，之前喺西環一間出名食牛骨髓嘅西餐廳食過骨髓，感覺好油同蘇，但呢次將骨髓當牛油咁塗上麵包食，麵包鬆脆好趙口，配上「牛油」香真係極正，我當時真係想要求加麵包 (不過高級餐廳，顧及形象，我冇咁做，亦唔知得唔得)第二道菜係嫩滑嘅生牛肉用左D醋撈醃過 (我估，應該係？)，好醒胃，雪茄外殼脆，兩者配搭又係恰到好處，餐廳又特意用雪茄盒上菜，雪茄又配上雪茄指環，心思十足，造型滿分，又係抵讚!第三道菜係朱古力牛面頰，牛面珠我之前中菜食過2次，又腍又嫩，梗係好味。佢呢度用朱古力煮嘅西式煮法，肉質當然都係又腍又嫩無得輸，佢特別在我食落口之前係以為佢係甜，食入口原來係咸
呢間餐廳主打8道菜Omakase全牛宴，法國菜同fusion都試過，有D真係又貴又唔飽，你要食好少少又要加錢，呢間就好均真，每位只係$780， 飲酒先另收費，任君喜好。
以經理講，我同太座食果個係餐廳啱啱11月先出新菜單，我當時都有少少擔心，怕同之前網上搜集啲資料唔同出事，結果當然係無事，仲好滿意。
第一道菜就有驚喜，之前喺西環一間出名食牛骨髓嘅西餐廳食過骨髓，感覺好油同蘇，但呢次將骨髓當牛油咁塗上麵包食，麵包鬆脆好趙口，配上「牛油」香真係極正，我當時真係想要求加麵包 (不過高級餐廳，顧及形象，我冇咁做，亦唔知得唔得)
第二道菜係嫩滑嘅生牛肉用左D醋撈醃過 (我估，應該係？)，好醒胃，雪茄外殼脆，兩者配搭又係恰到好處，餐廳又特意用雪茄盒上菜，雪茄又配上雪茄指環，心思十足，造型滿分，又係抵讚!
第三道菜係朱古力牛面頰，牛面珠我之前中菜食過2次，又腍又嫩，梗係好味。佢呢度用朱古力煮嘅西式煮法，肉質當然都係又腍又嫩無得輸，佢特別在我食落口之前係以為佢係甜，食入口原來係咸，咬多幾啖又會出朱古力味，不停顛覆我對呢道菜嘅預判。
第四道菜係Dry-aged 和牛舌芯，牛舌食過過百次，要煮得好食其實好難，煮得唔好或者果件牛舌唔靚好易又乾又蘇。呢件牛舌芯當然係成條牛舌最好味個位，個廚又煮得啱啱好，我哋加幾滴檸檬汁點少少鹽，用刀慢慢切細先放入口，咁樣食好好咬口 (唔知關唔關Dry-aged過事)，我同太座都認為係我哋食過最好味嘅牛舌三甲 (包括日本食肆在內)
第五道牛肉清湯配雲吞，自問我同太座飲慣屋企中式湯，餐廳嘅湯要贏得我哋歡心係好難，西湯/ 凍湯 (通常都係攪碎晒D食材)就更唔係我地至愛。呢個法式清湯唔係話驚天地 泣鬼神咁正，但就畀左我對西湯嘅一個新體驗，意外係伴碟件雲吞一啲都唔求其，仲好好味，我欣賞廚師呢份細緻。
第六道菜就係打大佬 - 牛扒三重奏 ，當晚廚師發辦安排左封門柳、M9朱古力和牛同埋28日乾式熟成Prime級肉眼，份量十足。封門柳有幾珍貴有幾好味唔多講；經理話朱古力和牛每日食2 KG朱古力，肥瘦適中，肉汁多而濃，都係好野黎；反而小弟想講下件熟成左嘅肉眼，我第一次食熟成嘅牛扒，少少咸 (千祈唔好點鹽），有啲似高級Parma Ham，但因為肉眼本身靚，咬入口係好爽好彈，送酒真係一流。另外，更想講下D配菜，果件千層薯蓉同個菇，真係唔好唔食，成功在細節⋯⋯打完呢個大佬，我同太座已經飽到喉嚨頂⋯⋯
點知，第七道菜仲有M9和牛煲仔飯，OMG！煮梗飯已聞到飯香，經理將和牛加入沙煲焗，香到呢⋯⋯再落鼓油焗飯焦，我同太座講冇辦法唔食，最多第日跑多幾K ，食落口，正到呢⋯⋯最後我哋清晒成煲煲仔飯，失禮晒！(真係好耐無喺香港食過一個咁正嘅煲仔飯，仲要咁矜貴)
最後奉上蕃紅花雪糕，完美句號，捧住個肚走，十分滿意，十分滿足！
手工麵包配烤骨髓
8 views
0 likes
0 comments
朱古力牛面頰
9 views
0 likes
0 comments
Dry-aged和牛舌芯
8 views
1 likes
0 comments
牛肉清湯配雲吞
10 views
0 likes
0 comments
牛扒三重奏
10 views
0 likes
0 comments
M9和牛煲仔飯
9 views
0 likes
0 comments
蕃紅花雪糕
6 views
0 likes
0 comments
Other Info. :
老老實實，出去食一塊靚啲嘅扒都600-800，食個tasting menu或者omakase冇1300＋都落唔到樓，呢度食物質素同份量都好好，咁嘅價錢，真係好有良心，性價比極高!
溫馨提示：飯後同經理吹左幾句，先知呢度唔原來每晚只做5枱客，貴精不貴多，真係好易爆，訂枱趁早！
(The above review is the personal opinion of a user which does not represent OpenRice's point of view.)
Post
