波記 (Closed)

閒時掀開《飲食男女》，見到「少年食神」話石塘咀波記只會做到今年底，心感可惜，反正人在中環，一於搭程丁丁入去食番碗鴨脾瀨。夜晚七點來到位於斜路上的波記，店內坐滿了人，唯有站在門外稍等，阿姐見狀立即開檯給我們，服務真好。不用看餐牌，就來一碗鴨脾瀨 ($32)，女友則要了鴨脾撈粗 ($37)，再加碟腐乳通菜 ($10) 就行了。波記的鴨脾雖然是來貨，但勝在入口皮脆肉嫩，以此價錢確是幾吸引的，可惜當晚的瀨粉煮得比較碎，湯底亦略嫌太淡，無乜味道，只得一股來自蔥粒的香，如跟上趟吃到的水準比較，無疑是差了一點點。女友的撈粗比湯瀨貴五蚊，麵條是爽口的，但梘水味卻很明顯，睇在那隻美味的鴨脾份上，勉強拉成合格分數。少油的腐乳通菜幾爽嫩，可惜腐乳味道實在太鹹，最後唯有將菜放入湯底內「過冷河」，下次還是將腐乳另上會好一些。吃得飽飽，最後來一口雪得夠冰凍的可樂，感覺市井，但的確很滿足！埋單時順便問問阿姐係咪年尾執笠，答案係「搵緊舖位」，那就好了，希望這風味十足的鴨脾瀨不會就此消失吧！