民聲冰室 (Under Renovation)

大坑，老實講，真係第一次去。呢間茶記嘅蒸肉餅，都可以話係大坑必食之一，雖然知道好耐，但一直都無幫襯，今日終於撞啱時間，就去試試。星期六下午一點半去到，店內只有一家四口，仲有大把位。午餐：鹹蛋蒸肉餅（$58）一睇賣相，就知唔係一般蒸肉餅，係肉餅塔。望落好似好大堆頭，但其實份量無想像中咁多，同一般肉餅嘅size相約。雖然佢賣相同坊間好唔同，但味道其實分別不大。肉餅質地偏腍，肉質唔嚡，食落唔算太肥膩（肉餅中間有少量碎骨，咬嘅時候要小心）。粒鹹蛋好軟好粉，但唔咸。豉油覺得甜咗啲。白飯份量偏細碗。食後感：唔係唔好食，但唔覺得吹噓到好勁咁囉。順道經過+唔使等的話，一試無妨，但專登走嚟食，就唔多值了。PS：店內空間唔大，約十個位，多數會係店外露天下開枱加位。