大圍小館

Open Now

Now Closed

星期五晚約左班老友去食飯，知道大圍開左間中菜，又係大圍地鐵站隔離，雖然未食過，但有係大圍住嘅老友話，嗰間店好多人去飲茶食點心，時常都要排隊，咁相信都應該都唔錯，膽粗粗約埋一齊去試下。因為我自己收工收得遲，去到啲老友已經食緊啲前菜，佢哋話豉油王魷魚鬚好好食，不過...佢哋食晒囉。枱面上仲有啲海蜇、豬腳，海蜇就普普通通啦，但係豬腳真係幾好味，值得一試。👍原來佢哋叫左好多嘢食，乳豬、叉燒即燒即食，正！豉油王炒麵、薯仔牛柳粒、咕嚕肉、粟米斑塊、三杯雞(加辣)、啫啫芥蘭都有一定水準。👍👍不過，有幾個餸真係值得推介:花蟹籠仔蒸飯，飯有蟹鮮味，而且飯軟硬適中。乾燒蝦，非常野味，而且蝦肉爽滑。黑松露炒什菇，完全估唔到，炒菇原來可以咁爽脆。炸鮮奶，真係無得頂！！超好食！！外面脆漿薄脆而不油，內𥚃軟滑又有濃濃奶香，真係第一次食到咁好味嘅炸鮮奶！👍👍👍其實仲有好多嘢好想食，不過要等下次先可以再試，因為真係好飽！