喜惶點心專門店

Open Now

Now Closed

喜惶點心專門店老板係牛肉世家，三代攞牛肉，所以此鋪所有牛肉全部靚貨，但凡有牛肉嘅點心都係好食，有牛肉味。蔥花炸兩腸粉正正常常食開嘅味道，未見有乜野特別突出。無味精老火湯夠料老火湯，十蚊大大碗，是晚係木瓜雪耳煲肉排，唔鹹足料，有湯味，抵飲好飲，係衰在唔夠熱啫。紙包骨實在係太耐無食過，排骨與軟骨位，因為包住間油紙去炸，所以可以食到油炸嘅香脆但又唔係太油膩，但其實食味一般，食其回憶。金錢肚正常酒樓食味，無乜特別。陳皮山竹牛肉球依個好食，陳皮味同牛肉味好立體互相匹配，牛肉好明顯係靚貨，肉質嫩滑彈牙，有牛肉味，非常多汁，牛肉打得彈牙又結實，好食。乾蒸牛肉依個都好食嘅，但明顯與山竹肉球有嘅對比，有啲乾身，牛肉汁與山竹牛肉對比就明顯唔夠，但其實都係好食嘅。粟米煎牛餅食完蒸嘅就食煎，粟米嘅甜與牛肉嘅鮮都好匹配，雖然係煎，但係師傅控制得幾好，皮煎得幾乾身，但咬落還有肉汁，好食。密瓜炸鮮奶依個就好似食緊固體嘅陽光密瓜豆奶咁，係完全一樣味嘅，我原本就好鐘意密瓜豆奶嘅，所以覺得幾好食。整體而言，抵食又好食，好值得幫襯。