孖寶車仔麵

Open Now

Now Closed

葵廣美食多已是街知巷聞，日常正餐少不了香港最本土的車仔麵。自選快捷又款式多羅羅，總有一款岩心水。孖寶車仔麵位於葵廣地下近小巴站位置，設兩鋪。三餸麵套餐連熱飲$46 ，價錢合理。辣魚蛋、五香豬頸肉、咖喱魷魚拼油麵，配腩汁是我至愛組合兼日常之選；餐飲加左杯凍好立克（＋$3)。也點了一碗墨魚條碗仔翅同一份牛雜。店員效率十足亦爽快有禮。上餐時亦為粉麵餸加上蓋，添了份安心，堂食都食得放心。陳皮辣魚蛋嚼口十足，辣汁配落粉麵成自選汁，好滋味；豬頸肉微厚切，調得入味；凍食咖喱魷魚則分碟上，（最愛車仔餸）秘製咖喱汁偏辣，非常惹味。墨魚條碗仔翅，翅身不過稀反而足料。多麻油多醋多胡椒；簡單好味。牛雜甜醬黃芥辣，煮得軟腍，點齊兩醬剛好。