小南國 (Closed)

因為唔同嘅事忙左幾個月，依家終於做哂d野，有時間同屋企人食餐飯喇！今次就去左係沙田新城市廣場7樓嘅上海小南國陪媽媽食中餐。因為係週末嘅午飯時間，所以我地等左至少40分鐘先有位。餐廳係半開放式嘅，淨係得欄杆隔住，出面可以望到入面，同時出面嘅自然光都令環境好舒服。我地都叫左幾多野，先講糖醋小排骨啦。佢係推介菜式之一。糖醋汁好開胃，不過排骨嘅肉有啲鞋。南國蔥油開洋拌麵因為有蔥油，好香而且味道偏濃。呢個真係幾惹味，好快就俾我地食哂。豬排麵都係幾好味嘅。湯底用火腿黎熬，幾香。啲麵幾彈牙，唔會一pat pat咁。豬排鬆軟，不過唔知點解食到咖喱味。菌菇嫩雞煨麵相對起黎會清淡啲。用左雞湯做湯底，味道會柔和啲。麵嘅質感就淋身啲。總體黎講冇乜特别。小籠包ok，入面好多湯汁，個皮幾薄，味道中中挺挺。生煎包好好味，尤其是個底真係煎得好脆，令人食完仲想再食。棗泥千層糕嘅味道相比起我食過嘅紅棗糕有啲過甜，口感太糯，有多啲咬口會好啲。酒釀丸子就非常唔錯。桂花味好香，同酒味好夾。丸子好軟糯，係一個好清新嘅甜品。