札幌拉麵 Miso No.1

Open Now

Now Closed

話說我哋去荃灣睇Drama，去到2點半，得返1個鐘，就諗住喺大會堂附近食啲嘢，行下行下就去咗荃新天地2期，見到札幌拉麵Miso No.1，唔理咁多，入去食啦！點知嗰下午茶又幾抵食。招牌牛油拉麵札幌拉麵主打味噌湯，呢個招牌牛油拉麵附上一塊牛油，入口有濃郁嘅麵豉味同牛油香味，好暖胃，啱晒冬天。拉麵彈牙，叉燒半肥瘦，掂。最正係下午茶時段，呢個拉麵都係38蚊咋。燒鯖魚定食M佬揀咗嗰鯖魚定食，話要有飯落肚喎，成個阿伯咁。不過條鯖魚又燒得幾香，一啲都唔乾身，正。我哋咁大食，就梗係要叫小食啦，嗰樣又想食，呢樣又想食，好彩有M佬包底，哈哈！枝豆熱辣辣嘅枝豆特別好味，加埋少少鹽，真係吊晒啲味出嚟。北海道南瓜炸薯餅即叫即炸，嚟到熱辣辣，入口有好香嘅南瓜味，甜甜地，特別一提，係一啲都唔油膩。自家製餃子餃子新鮮煎起，皮薄香脆，粒粒都好足料，加埋七味粉同辣油，真係無得彈。串燒雞翼雞翼燒得好香脆乾，加少少檸檬汁，酸酸地，吊返啲鮮味出嚟。串燒雞軟骨15蚊有三串，燒得啱啱好，有少少燶，香脆有口感。（記住Like同Share畀朋友）