喜來稀肉 (Closed)

以前都有去過喜來稀肉其他分店，都覺得不錯，但係因為有一排好多人去，變左限時，就無再去喇。今次再黎，同朋友聚一聚。灣仔分店地方闊落，枱同枱中間有好大空間，可以同朋友好舒服咁傾計。掛住傾同食，唔記得影相添~4個朋友叫左一個牛嘅set（壹頭牛），可以燒下。我地仲有叫2個石鍋飯（石鍋拌飯，魚籽石頭鍋拌飯），一個湯，同一個煎餅。因為我地上網訂枱，每人有一個free drink。壹頭牛套餐幾好食，有5款肉，雖然個餐係2人套餐，份量都足夠我地4個人每樣都試到一至兩件。我地掛住講野，有D牛肉燒得耐左，不過都唔會好硬，唔錯！外圍嘅蛋係可以不斷添，我地覺得泡菜味好食D，另外個芝士味唔太突出。個蛋我地都食左3轉！湯有少少海鮮，有蜆，有半隻蟹。味道一般，同其他地方嘅湯差不多。煎餅比外面韓式餐廳嘅煎餅大，料都幾足，蔬菜算多。好香，味道好好。石鍋拌飯放得太耐先食，熱到鍋底有飯焦，變左D飯有少少硬。後加嘅魚籽石鍋拌飯幾好食，有好多魚籽，啖啖都有魚籽，仲有紫菜添。下次再去！