皇子印度餐廳 (海富樓)

Open Now

Now Closed

自從知道西灣河原來有間食印度菜嘅餐廳後就已經bookmark左，畢竟喺東區依類餐廳一向都唔多，今日放假終於有機會黎試下午餐。佢位置岩岩好喺工聯會隔離，地鐵站行過黎都要一段路。間鋪比較細，目測大概得8張檯左右，所以都等左一陣先入得。一坐底已經每人先送一碗湯，中午有lunch set 可以揀，選擇唔算多，我揀左串燒雞(配咖喱汁)，有得配白飯或者烤餅/薯仔烤餅/千層餅，飲品要另外加錢。因為一向都中意食印度薄餅，我地3個人黎食，就每人叫唔同嘅餅share。其實個串燒雞黎到嘅時候同我想象中有啲出入，我原先以為會一串串嗰啲，點知黎到原來係3大塊雞。雞係乾身嘅，啲肉都幾嫩，有少少辣，如果嫌dry嘅仲可以點咖喱汁。不過我嘅重點始終都係薄餅，我覺得佢啲烤餅都算大件，我尤其中意食佢嘅薯仔薄餅，裡面原來係夾左啲咖喱薯仔，另外再點埋咖喱汁就非常惹味。其實三款都好好味，真係食再多都唔會厭。食物黎講質素唔錯，價錢都適宜，係個環境有啲狹窄。而且間餐廳比我想象中多人，所以黎到嘅話可能都要有心理準備要等位。