豆漿大王

Open Now

Now Closed

今日星期日想食一個傳統中式早餐，但又唔想食茶餐廳，所以專程去新蒲崗食豆漿粢飯。豆漿大王在新蒲崗大有街工業區，左右隔離嘅食肆門口都係一樣，門口沒有大招牌，要行近見到門口Menu先至知道係豆漿大王。我哋叫咗幾款店主推介嘅食物鹹豆漿，好少飲鹹豆漿，第一啖食落去覺得怪怪地，但跟住習慣咗，覺得幾好飲，裡面有蝦米乾、油條塊、炸菜及蔥花。普通豆漿，不鹹不甜，枱上有糖，想甜要自己加糖，但沒有黃豆味。鹹粢飯，裡面有榨菜、肉鬆同油條。如果想加料可以加錢，我就全加料比多$7。個粢飯味道淡，全靠啲餡料，油條好脆，肉鬆軟綿綿，榨菜鹹鹹地幾好食。酸辣淨雲吞，酸辣湯好足料，有木耳、豆腐、蛋花、豬皮等，酸辣度適中。雲吞皮薄餡靚。肉鬆奶脆多，多士非常鬆脆，上面放滿非常鬆化嘅豬肉鬆，都幾特別，未食過可以試吓，但又唔係非食不可。雞翼炸得幾香口，炸粉唔厚，外皮有少少甜甜地，但整體覺得偏淡，如果可以加重少少調味料就會更加好食。總結：雖然係星期日早上，位置又喺工廠區，交通唔係好方便，但估唔到有好多人嚟食，門口都泊咗啲車專程嚟買外賣。放假得閒可以嚟試吓，價錢相宜，好過日日食茶餐廳。