波記(大排檔) (Closed)

呢度位置幾隱秘，雖然在皇后大道中一轉上來就見到，但在呢頭做左幾年野都係同事介紹至找到來。正確位置是余仁生隔離石級行上少少就到，街名叫士他花利。呢度有小菜供應，但最強的是炒粉麵，即叫即炒夠鑊氣，又大大碟，四個人來吃叫三碟就得。吃過干炒牛河同星州米，都好有水準；最值得一吃是各種炒麵，呢度的炒麵係將細個果時在酒樓吃肉絲炒麵，D麵炸到脆卜卜果種，而家唔係咁多地方吃得到。大部份炒粉麵都係21蚊，算幾平。當然又係果句，呢度係正宗大排檔，即得個鐵皮檔係舖面，檯櫈都擺在路邊果種，環境唔會好得去邊，唔介意穿套裝坐圓櫈的話可一試。仲有就係因為呢度條巷幾窄，所以油煙都幾勁，上次我去食完返到公司同事仲以為我地去食韓烤，怕油煙就最好買走。