鋿晶館 (上水匯) (Under Renovation)

放假同朋友嚟上水行下，本來有人打算北上搵食，路經上水匯，發現原來「鋿晶館」喺呢度開咗新分店，即時轉呔，一於留港消費。餐廳由米芝蓮西餐大廚及中華料理携手合作主理，以中西融合為主題，形象嶄新。餐廳是自家製品牌，餐牌選項非常豐富，除咗一系列養生燉湯、鑊氣小炒外，仲有健康沙律、荷葉籠仔蒸飯、銷魂咖哩等供應。點咗👇黑蒜響螺燉赤肉湯，盅湯非常足料，內有一大粒完整黑蒜、瘦肉同響螺。嘗一口，湯水味道好正，帶微微甘甜，充滿著黑蒜香味，而且飲完絕對唔會覺得口渴，滋陰又潤燥。脆炸魚柳菠蘿包， 菠蘿包賣相超吸引，外皮鬆脆，麵包軟熟，食落唔膩滯。魚柳炸至香脆，肉質 Juicy 細嫩，而且夠大塊，相當厚身，配菠蘿包食一流！原條蒲田燒鰻魚蛋包飯，鰻魚原條上，無花無假，比手掌還要長，燒到表面微脆，入口啖啖肉，軟嫩彈滑又富油脂。雞蛋煎到有燶邊，食落好香口，同肥美嘅鰻魚簡值係絕配。飲品點咗杯山楂蘋果，蘋果具生津止渴、健脾益胃功效；而山楂則有利於降血脂、抗氧化之效，入口酸酸甜甜，消暑又解渴。