蓮香棧 (Closed)

如果你係一個懷舊嘅人，一定唔可以錯過「蓮香棧」，上至裝修，下至菜式，都離唔開傳統兩個字。一行入去，古色古香嘅仿紫壇木裝潢，令人猶如去咗七、八十年代，天花板掛滿吊扇，牆上又掛上雀籠... ...呢啲都係舊式茶樓嘅特色！座位嘅枱有兩層，面層係擺點心，下層係擺客人嘅物品。聽講以前嘅茶樓係按蒸籠計數，好多茶客都會將啲籠收喺下層，咁就可以瞞天過海，收少幾籠錢。不過大家千祈唔好咁做，係犯法架（當然依家用點心紙或電腦落單，想走數都難）！點心方面，蝦餃燒賣鳳爪等傳統點心係必備，但小妹只聞其名，未嘗其味嘅一定非「金錢雞」莫屬！原本以為係雞肉點心嘅我，一食就滿口油花，原來係膽固醇超高嘅豬肉、雞肝同肥豬肉夾成嘅三高組合，將佢哋切成圓形，串埋一齊燒，燒嘅時候塗上蜜糖同麻油，外表似叉燒。晴天霹靂後就係一陣甘、香、甜、潤嘅滋味，咁大個女第一次食咁得意嘅嘢！店內仲有另一傳統美食——鴨掌包，但為咗健康著想，下次先試！另外，佢仲有薑汁糕，呢款手工菜要逐層蒸，超花功夫同時間，只有老店先有咁嘅功力！食落薑味濃郁又Ｑ彈，係落足料之作！