台食館 (獨立大廈)

Open Now

Now Closed

返工返到一頭煙，忙到得半粒鐘食飯，最後求其揀咗公司附近一間台食店試下。本身無咩期望，只係但求食個快飯填飽個肚就算，點知食落都有驚喜！甫入店內，已經見到人頭湧湧，驚住要排隊嘅我已經考慮轉場，好彩店員見到我即刻同我打招呼，加上我只係一個人，所以即刻有位，完全唔使等(所以有時毒食都有毒食嘅好處㗎！)午餐有set同散嗌，分別係有無餐飲跟。我最後揀咗一份鹽酥雞排湯麵，跟熱檸茶，盛惠$55。送餐時間快，落單唔夠5分鐘已經有得食，對繁忙嘅都市人嚟講簡直係恩物！講一講味道先，雞排熱、脆、皮薄肉厚而唔韌，鹽同咸味啱啱好，味道算得上一流；講真，呢個價錢呢個水準真係令我好驚喜！麵方面，佢係一種類似手工麵嘅粗身麵條，口感似上海麵同烏冬嘅混合體，湯底濃度啱啱好！最後講下杯熱飲，檸檬片好多，味道正常，穩陣之選。提一提份量，對女仔嚟講都算幾大碗，我最後都食唔哂啲雞排，所以份量嚟講係正常偏多。整體嚟講，不論味道、份量、價錢同埋服務態度都係好好，美中不足係環境太過狹窄，有部分座位對正洗碗位置，但瑕不掩瑜，值得推薦！