漢城美食 (Closed)

韓式美食癮又起,要又平又正,去尖咀金巴利街就最好~上次食左亞之媽,今次就試對面既漢城~btw,首爾都改左名咁耐,點解仲要叫做漢城呢???呢度菜式選擇都幾多,由粉麵飯,去到地道小吃都有,價錢方面算係中價位~先來兩碟前菜~雖然醃蘿蔔同泡辣白菜感覺好行貨,不過又係我最鍾意既前菜喎~當然味道唔會有咩驚喜,但亦保證唔會難食~好多款韓菜我都鍾意食,其中一樣竟然係韓式炸醬麵~佢當然唔係中式炸醬麵做法,味道亦唔係鹹同辣,而係甜甜地,啱晒唔食得辣既人~材料好簡單,只得洋蔥,薯仔粒同埋少少肉柆,加埋d甜甜地既醬,真係好啱我之前病病地食,哈哈~麵條幾煙韌彈牙,分量都唔少~整體來說,做法同味道算幾正宗~呢個係烤牛肉+白飯~個餐牌真係咁寫,咁都好,起碼唔會好似上次亞之媽咁,根本都唔知個菜式跟唔跟飯~叫做烤牛肉,其實d牛肉好似牛肉碎咁,碎濕濕的~還好,調味都做得唔錯,送飯一流~姣婆始終守唔到寡,叫左兩個清淡唔辣既餸,結果都係忍唔住,叫多個辣炒年糕拉麵~唔知係咪當時仲病緊,喉嚨特別敏感,呢碟野幾鬼辣(可能正常狀態下會好d)~年糕略嫌未夠腍,好彩有我好鍾意食既魚片幫補下~