HARA

Open Now

Now Closed

上網見到佐敦開咗呢間做西日fusion菜嘅餐廳，好似好吸引，放假特登去試吓。餐廳服務幾好，店員不時加茶，上菜亦每一道一道上，可以慢慢享受食物。燒原條喜之次$168竟然有喜之次食喎🤩，即刻要點嚟試試。以佢價錢，我唔會expect太多，喜之次細細條，燒得魚鰭部位脆卜卜，肉質都ok，加咗少少黑椒同鹽調味，食魚嘅原味。烤龍蝦海鮮拼盤$298好豐富😌，有3隻大大隻嘅托托蜆、1隻好厚身嘅蒜香蔥粒燒扇貝、半隻爽口彈牙龍蝦，隻蚶仲已經細心剝咗殼添，另外仲有一隻甘香炸軟殼蟹同埋一堆鮮嫩魷魚圈魷魚鬚。睡蟹意大利飯$208呢個我見人哋啲相好精緻，啲飯係釀落蟹蓋度😍，但係當日店員告知蟹嘅供應商出變，冇晒蟹蓋，打卡冇咁靚，有啲小失望🙈，但係我哋都照樣點呢個飯食。意大利飯有咬口，伴入南瓜蓉同埋一絲絲蟹肉，上面仲慷慨地鋪滿厚厚嘅蟹膏加蟹肉😋，加上鮮味嘅三文魚子，正。個份量應該比原先嘅釀蟹蓋仲要多呢！紅豆綠茶雪糕$58甜品我哋就揀咗個比較日式嘅，雪糕造型好得意，係一粒一粒正方體，綠茶味非常濃郁，雪糕非常滑，配埋粒粒紅豆蓉，好食。