普光齋

Open Now

Now Closed

尋日星期二經過彌敦道，見到普光齋，都有多年未曾食過齋，一於試吓幫襯老齋鋪。雖然快下午四點鐘，店舖樓下坐滿八成左右客人，齋舖都有下午茶餐優惠，所以叫咗個下午茶套餐，再多叫一碟齋滷味拼盤。齋拼盤齋叉燒質地好實，顏色紅噹噹微甜，口感不太接受。齋鴨腎質地有咬口，甜甜地似咬一舊硬粉團嘅感覺，味道都係略甜。咖喱齋只帶咖喱香味，軟腍度較為挺身，口感都可以。圓形齋雞就腍腍軟滑，似食德國Frankfurter香腸，味道清淡。甜酸齋軟腍腍，適量甜甜酸酸非常易入口，係我最喜歡嘅一種。豉油齋味道稍淡，煙煙韌韌，口感同甜酸齋非常相似。素鵝稍為煎炸個皮面，質地煙靭味道濃郁，比較好食兼有特色。羅漢齋炒麵就只有炸過嘅麵，炸麵好韌又襟𡁻而且有少少脆脆口，冬菇腍身好味，冬菇木耳同草菇味道略為清淡，整體好一般。蘿蔔糕粉多糊口，食到最後嗰塊終於俾我食到有幾粒蘿蔔粒。齋店裝修似去返70年代嘅時空，枱凳擺設空間較為狹窄，碗筷杯碟及店面清潔整齊，店員服務態度殷勤盡力，對顧客非常有禮貌。並且留意到佢哋有派免費飯盒比街坊，值得一讚！雖然食物水準質素一般，有機會我都會再去幫襯佢哋。