白鬍子炸魚薯條 (Closed)

同朋友去海旁談心，去到中環碼頭，聞到香噴噴嘅炸魚味，原來呢度有一間小店食炸魚薯條，見到好多外國人拎住啤酒坐喺出邊等，好似好新鮮熱辣，今晚晚餐就喺呢度。我哋叫咗個一口炸魚薯條（$63），方便同朋友分吃，之後要左我最愛嘅蠔，白啤酒炸生蠔（3pcs$48/6pcs$78)因為未食過唔知佢份量，所以就加錢要咗洋蔥圈3pcs(+15)同埋魷魚圈2pcs(+$12)，冇叫單點。買完企係一邊等一陣，整好佢就會嗌no., 我仲揀咗兩款醬汁，Mustard, Tartar, 我覺得兩個醬之中，他他比較好食。熱辣辣嘅一口炸魚，分量兩個人啱啱好，炸粉唔會太多，炸到啱啱好，魚唔腥啖啖肉，我哋兩個都好鍾意。我真係好鍾意食蠔，外脆內嫩，一咬入邊就好嫩滑鮮味，我一個人食咗兩隻，好後悔點解唔叫大份。不過食呢隻蠔會有啲飽肚嘅感覺。洋蔥圈同魷魚圈，雖然大家都係圈，但完全魷魚圈勝利，魷魚好嫩，唔會炸得過龍，但洋蔥有啲黐埋咬唔開，可能我本身唔係太鍾意食洋蔥啦。我哋去咗一個比較靜啲嘅位，坐係海邊，趁住天氣開始有啲微涼，一邊吹海風一邊食，再加上一杯啤酒，簡單舒服嘅一個晚餐，好似生活左係莫內畫入邊咁。