餓媽家姐 (Moved) New Location

好耐冇去厚福街，見到有間外賣店叫餓媽家姐，個名好搞笑，於是過去望吓。原來主打係burger，仲有港式小食，當中XO醬炒腸粉，似乎都係名物。橫掂都未食飯，所以決定嗌個外賣拎走。店內面積唔大，有張枱仔俾人離開前整理好外賣或立食。今次叫左三樣野：芝士煙肉安格斯漢堡、XO醬蛋牛肉炒腸粉同埋炎上一口和牛。漢堡包嘅牛肉肉質鮮嫩，牛肉味濃，加埋半融既芝士、煎香佢左嘅煙肉，新鮮嘅生菜蕃茄、個包仲要係竹炭包，所有嘢加埋一齊真係人間美味。XO醬蛋牛肉炒腸粉亦有驚喜。牛肉有好多片，而且食得出係冇用鬆肉粉拿到淋哂，腸粉亦都冇炒到一pat pat，條條分明，加埋XO醬， 碟腸粉真係好惹味，會想再encore。最後係炎上一口和牛。和牛粒帶微紅，肉汁豐富，肉味亦濃。三樣嘢加埋$140 ，價錢合理，食物高質素，而且地點方便，一定會再嚟。