恩嚐甜品

Open Now

Now Closed

今日陪屋企人嚟采頤花園睇樓，離開嘅時候見到呢間恩嚐甜品，就順便買啲甜品返屋企。呢度嘅芒果黑糯米腸粉賣相十分精緻，而且上面仲淋有新鮮芒果汁。入面嘅芒果大大件，再伴以滿滿的黑糯米，當然唔少得椰汁大菜糕嘅外皮，真係好睇又好食。我就最鍾意食豆腐花，所以揀咗日式軟滑豆腐，仲加配咗紅豆(+$7)同雪糕(+$9)。紅豆份量相當多，仲有一大球雪糕。佢嘅日式豆腐比平時食嘅豆腐花更加軟滑，除咗有豆腐嘅香味，仲帶點奶香，配合半溶嘅雲呢拿雪糕就更加滋味，而佢嘅紅豆亦都煮得夠腍夠甜，成個配搭非常匹配。店員仲推介我哋試呢個檸檬汁凍疏乎厘，起初都覺得有啲其貌不揚。不過入口就甚有驚喜，檸檬汁味道帶酸亦帶甜，有啲似細個食檸檬味瑞士糖嘅味道，疏乎厘用蛋白打成，入面仲有一個個細小嘅氣泡，口感非常綿滑，好味之餘亦唔會覺得油膩。呢間恩嚐甜品嘅味道都幾出色，而且仲有好多唔同種類可供選擇，希望有機會再嚟呢度試其他嘅款式。