經典廚房 (H.A.N.D.S) (Closed)

今日天氣非常酷熱, 懶洋洋訓到中午1點半, 訓足12個鐘, 想食點心, 近近地揀左經典廚房, 去到見有人等位, 我地兩位, 肯搭枱的, 下一張就到, 都好快! 坐低原來我地係坐先果個, 未有其他人, 後來只係搭左一位女士, 都唔迫。留意啦, 假日下午茶時段, 叫中點同大點係比較抵食架。粉紅色果張特價下午茶點心紙亦值得考慮。燒鵝瀨粉: 個湯底幾淡無咩味, 燒鵝還可, 偏瘦但唔"鞋", 仲比埋酸梅醬, 點醬食有風味。叉燒腸: 都幾厚皮, 不過個皮唔算難食, 都滑同有米香, 叉燒普通咁啦。韓式煎餃子: 唔係我想像中長方形偏偏的樣子, 外表係普通餃子, 餡係粟米同豬肉, 皮薄餡多, 味道不錯, 只係唔韓式。牛肉球: 味道似樣, 食落幾多肥肉, 不過我就係鍾意佢呢陣脂香同埋淋淋的感覺, 一定要加喼汁。燒賣: 有水準既, 有鮮肉香, 個樣都靚。雞扎: 雞好滑呀, 仲有冬菇、火腿等, 但係無芋頭好似差緊D野咁。咸水角: 最後先上嘅一道點心, 係值得等嘅, 外皮口感軟熟, 餡料味道似樣, 好新鮮熱辣, 應該係即製的。自己拎張咭出去埋單, 櫃位收左咭只係話幾多錢, 無比張單黎睇, 其實應該要比單客人睇囉