Youni (Under Renovation)

本身見到openrice得好少食評，其實都有啲心大心細去唔去食好，不過sell健康嘅食店又要平又要好食真係難搵啲，所以膽粗粗去試下。上到去四樓，間舖係起間gym入面，可以話係一路對住啲大隻佬做gym一路食飯lol基本上都唔太多人，加上有好多梳化同枱，去到就有得坐。餐牌上面所有嘢都有標明幾多卡路里，對於要keep fit嘅人可以作個參考。大部份食物都係68至78蚊左右，我就揀咗個日式照燒雞扒飯食，加咗五蚊轉藜麥，total $73 （不過我用咗apps訂枱，所以有八折，折咗58蚊左右，算幾抵食）叫咗之後5分鐘左右就已經有得食，有埋專人送過嚟，唔洗出counter拎。兜嘢比我想像中大兜好多，果兩舊雞扒每塊都大過我手掌，所以我係食唔曬的。整體嚟講味道唔差，因為本人口味比較淡，個汁對我嚟講略鹹，但尚可接受。入面有大量沙律菜，加咗麻醬，味道清新。另外仲有啲雜豆同豆腐，同埋半隻蛋，都幾豐富。總括嚟講都幾推薦一試。