醉美島 (Closed)

元朗雞地出名多野食，今次就去左雞地食串燒，舖內外都有位。呢間係串燒為主,店內裝修舒服，呢個特色牆都好特別～用自助落單都係會瘋狂叫野食😂😂有惹味臭豆腐串，雞泡魚乾，五花肉串，特中蒜茸燒生蠔🦪，洋蔥魷魚鬚，魷魚板串，川燒牛串，惹味牛舌，雞軟骨串，燒雞皮，醉美島海鮮鍋，生啤，百香果沙冰🤣🤣上串燒前會上一塊熱板，之後上既串燒都會放係熱板上面，咁就會keep 住串燒既熱度。佢地每一串肉都燒到香噴噴，仲可以自己落孜然粉，其他調味料～呢度既五花肉串，牛舌，雞皮，燒生蠔都好正～五花肉串肥瘦均勻，雞皮好脆好好食。燒生蠔🦪都冇得輸，生蠔冇燒到乾哂身，仲keep 到漲卜卜，軟軟既口感。洋蔥魷魚鬚，有埋粉絲架🤤🤤雞泡魚乾好香口，配埋酒一齊食，正呀！另外，佢地既海鮮鍋都好值得試，除左有大大隻蟹係裡面，仲有蝦，鮑魚，配料仲有吸汁既粟米，豆卜，吸哂海鮮既精華好味☺️☺️呢度既食物不錯，價錢都唔貴，真係可以再去。