竹串日本料理 (Closed)

剛剛去完日本一轉，返港雖只有兩天，但味蕾仍掛念著上機前喺黑門市場食o既刺身早餐，今日終於忍唔住又想食魚生，結果當然係孖會計小姐去覓食啦！二人就憑之前喺街上接收到o既傳單，決定一試可享八八折優惠o既「竹串日本料理」。餐店內外o既裝備都用木為主材，感覺乾爽企理。店子右方有個壽司吧。最舒適應該係貼牆o既四人皮櫈卡位。因午飯時間僅有一小時，兩口子早已喺網上查閱過午市餐牌，埋位即點選咗兩客丼丼。兩款丼物套餐均附上沙律、味噌湯、小食及甜品。沙律：薯仔沙律清涼爽脆，極易入口。小食：海蜇爽潤惹味，微辣醒胃。極上魚生飯（$98）：大大碗o既魚生飯含帶子、牡丹蝦、三文魚、吞拿魚、油甘魚及海膽，十分豐富。丼物o既魚生飯底粒粒飽滿，大大隻帶子白滑幼嫩。油甘魚爽厚肥美。三文魚柔潤鮮甜。牡丹蝦爽甜潤滑。海膽則香濃滑溜。每樣食材都一樣咁鮮香美味， $98絕對抵食。會計小姐最愛食魚，鰻魚更係佢「飛佛」，所以就點咗客「極上鰻魚丼飯」。XO仔一向怕骨唔敢食魚，何況係咁多細骨o既鰻魚呢？！原條長長o既鰻魚實在震撼，結果細佬都係忍唔到手要俾自己部手機先食。