大喜慶魚翅酒家 (Closed)

自從大喜慶搬到現址都未幫襯過，以前舊舖反而拉衫尾來食過兩三次魚翅。今日同個行家來飲茶，呢度下晝都幾多人，聽個行家講係因為D點心平左的關係，佢係熟客所以好快有位。兩個人叫左六個點心：雞球大包幾大同足料，係我至喜愛的廣東點心之一，可惜唔係間間酒樓有得賣；煎粉果亦不錯，外皮脆入面仍保持濕軟，浸上湯吃仍脆口，有水準；蕃薯棗比一般春卷有特色，香口又好味道；柚皮蒸排骨中的柚皮好食過排骨，這裡的柚皮無苦味，略油膩但好味；芝麻糕有芝麻味又有椰汁味，平衡番其他油膩的點心，幾正；金錢雞卷又係另一個我的至愛，浸了玫瑰露的肥豬肉加雞肝，簡直是人間美味。可惜而家無咩人識食和敢食，所以都好少地方有得賣，好似只有老店如蓮香、得龍、大榮華同呢度有。其實點解九唔搭八的煎鵝/鴨肝都敢食，但呢味傳統廣東點心又唔敢食呢？真奇怪。同金錢雞齊名天下的當然是金銀潤，不過有得賣的地方就更少。最後叫了碟叉燒蝦膏炒飯，叉燒是肥叉，好香口好正。埋單二百蚊有找，感覺係平左好多，點心食物水準都不俗，物有所值。題外話：臨走見有雷射商標大閘蟹，價錢相宜，雖近水尾，但搞多餐蟹宴都好喎！